Қардың күрт еруінен “Шұбалаң-Қарасу” бағытындағы Ақкөл ауылынан 18 км қашықтықтағы жолды  су шайып кеткен. Елді мекеннің Ахмет Байтұрсынов ауылымен  арасы жылдағыдай езіліп жатыр.

Арқалық қаласы Северный кенті Пролетарский көшесі бойында еріген қардың суы үйлерге жолдың үстімен өтіп кетпеу мақсатында жолдың жиегіне 4 камаз құм төселген.

Бүгін қала әкімі Марат Жүндібаев су басу қаупі бар – «Қостанай–2», «Колесные ряды», «Қонай» және “Дружба” тұрғын аудандары мен «Текстильщик» бау-бақша қоғамын аралап, ерінді сулардың су бұру арналарын тексерді.

Аманкелдідегі апатқа қатысты шұғыл ақпарат келіп түсті. Оған қарсы іс-шаралар барысында 880 тоннадан астам қож және 120 тонна топырақ пайдаланылды, 300-ден астам қапшық төселген. Жеке тұрғын үйлердің ауласына инертті материалдар құйылып жатыр.

Дәл қазір Аманкелді селосындағы 12 үйді су басты. Оның үшеуі бір пәтерлі жеке жайлар.

Аманкелді ауданының орталығын топан су жайлады. Ол туралы село тұрғыны Әлия Ахметова хабарласты.

Кешелі бері әлеуметтік желілерде Торғай-Шеген бағытындағы көтерме жолды қар суы шайып кеткені жөнінде фото, бейне қаптап кетті. Аудан орталығының оңтүстік-батысында орналасқан қос елді мекен  – Шеген мен Ақшығанақ ауылдарына қатынас тоқтады делінген әлгі жазбалардың бірінде. Мәселенің анық-қанығын аудандық ішкі саясат бөліміндегілер айтты.

Дәл қазіргі уақытта Қостанай, Арқалық, Аманкелді және Жанкелдин аудандарында су басу қатерінен құтқару жұмыстары жүргізіліп жатыр.