Бүгін, 15 наурыз күні елімізде жаңа Конституция жобасын қабылдау бойынша жалпыхалықтық референдум басталды. Осыған орай таңғы сағат 07:00-де №3 референдум учаскесі өз жұмысын бастады.
Әнұран шырқалған соң, өз дауыс берушілеріне есігін айқара ашты. Мұнда 1500-ге жуық тұрғын өз таңдауын жасамақ.
– Дауыс беру процесін заң талаптарына сәйкес өткізу үшін барлық қажетті жағдай жасалған. Комиссия мүшелері толық құрамда жұмыс істеп жатыр, бақылаушылар да қатысуда. Әрбір азаматтың өз таңдауын жасауға мүмкіндік бар, – деді учаскелік комиссиясының төрағасы Гүлнара Кучикова.
Алғашқы болып өз таңдауын жасауға келген жанның бірі – Амантай Исмағамбетов. Тиісінше бірінші болып таңдау жасаған соң, сыйлыққа да ие болды. Ол бұл референдумның елдің болашағын айқындайтын маңызды қадам екенін жеткізді. Осылайша азаматтық борышын орындауға келгенін айтады.
– Бүгін референдумға қатысып, алғашқылардың бірі болып дауыс бергеніме қуаныштымын. Бұл – еліміздің болашағына қатысты маңызды тарихи сәт. Әрбір азамат өз таңдауын жасап, мемлекетіміздің дамуына үлес қосуы керек деп ойлаймын. Сондықтан ерте келіп, азаматтық борышымды орындауды жөн көрдім, – деді алғашқылардың бірі болып дауыс берген сайлаушы Амантай Исмағамбетов.
Референдум учаскелері кешкі сағат 20:00-ге дейін жұмыс істейді. Осы уақыт аралығында дауыс беруге құқығы бар барлық азамат өз учаскесіне келіп, референдумға қатыса алады.
Айта кетейік, Ел Президенті Қасым-Жомарт Тоқаев осы жылдың 11 ақпанда референдум өткізу туралы Жарлыққа қол қойған болатын.