Қостанай қаласының әкімдігі көктемнің келуі мен жаңарудың белгісі саналатын Наурыз мейрамы кең көлемде бағдарлама әзірлеп отыр. 16–22 наурыз аралығында қала тұрғындары мен қонақтарына арналған мәдени, танымдық, спорттық және ойын-сауық іс-шаралары ұйымдастырылмақ.
Әр күн белгілі бір тақырыпқа арналып, ұлттық дәстүрлер мен құндылықтарды дәріптеуге бағытталған.
16 наурыз – Мәдениет және ұлттық салт-дәстүр күні
Бұл күні ұлттық мәдениет пен салт-дәстүрлерге арналған түрлі іс-шаралар өтеді. Ы. Алтынсарин атындағы балалар мен жасөспірімдерге арналған облыстық кітапханада «ЭтноMix в библиотеке» атты этносаяхат пен «Наурыз – көктем мейрамы» шығармашылық шеберханасы ұйымдастырылады.
Сонымен қатар «Достастық пен мейірімділік – Наурыз» атты әдеби-музыкалық кеш өтеді.
Л. Толстой атындағы облыстық әмбебап ғылыми кітапханасында Мұхаметқали Рахалиевтің «Традиции Наурыза» атты сәндік-қолданбалы өнер көрмесі бір ай бойы көрермен назарына ұсынылады. Ал А. Никифоров атындағы көркемсурет мектебінде 15–30 наурыз аралығында «Халық өнерінің бастауында» атты көрме өтеді.
Кешкі уақытта қаладағы «Mart» және «Kostanay Plaza» сауда-ойын-сауық орталықтарында «Кел төрлет, мерейлі Наурыз!» концерттік бағдарламасы ұйымдастырылады. Ал Жастар сарайында Қазақстанның танымал әншісі Мақпал Жүнісованың «Мерекелік ән кеші» концерті өтеді.
17 наурыз – Шаңырақ күні
Отбасы құндылықтарын насихаттауға арналған бұл күні түрлі танымдық және мәдени іс-шаралар өткізіледі. Ы. Алтынсарин кітапханасында «Знаю ли я обычаи и традиции казахского народа» атты интеллектуалдық викторина өтеді.
Облыстық қазақ драма театрында балаларға арналған «Алладин» спектаклі қойылады. Сонымен қатар «Ата салтын ардақтайық» танымдық бағдарламасы, «Наурыз – береке бастауы!» концерттік бағдарламасы және «Наурыз достарын шақырады» атты VII халықаралық хореографиялық өнер фестивалі ұйымдастырылады.
Бұл күні сондай-ақ қолөнер байқауы, ойын-сауық бағдарламалары мен концерт-көрмелер де жоспарланған.
18 наурыз – Ұлттық киім күні
Ұлттық киімдерді насихаттауға арналған мерекелік күнде облыстық қазақ драма театрында «Ер-Төстік» ертегісі сахналанады. Жастар сарайында халықаралық хореографиялық фестиваль жалғасады.
«Салт-дәстүрлер сөйлейді» атты этнографиялық кеш, концерттік бағдарламалар мен ұлттық қолданбалы шығармашылық көрмелері өтеді. Кешкі уақытта «Мирас» мәдениет сарайында «QazaqFashion» атты қазақтың ұлттық киімдерінің сән көрсетілімі ұйымдастырылады.
19 наурыз – Жаңару күні
Бұл күні қалада қайырымдылық және мәдени акциялар ұйымдастырылады. Сауда үйлері мен банктерде «Баурсаки, скидки и доброе солнце» акциясы өтеді. Әуежайда «Қонақжайлы Қостанай Наурыз мейрамын тойлайды!» атты акция ұйымдастырылады.
Сонымен қатар ұлттық тағамдар байқауы, фольклорлық-этнографиялық мереке, флешмобтар мен ойын-сауық бағдарламалары өтеді. «IQOSTANAY» SMART-орталығында «Наурыз 2.0: Энергия обновления» атты технологиялық квест ұйымдастырылады. Кешке «Мирас» мәдениет сарайында муниципалды BigBand джаз оркестрінің «Ұлы дала әуендері» атты концерті өтеді.
20 наурыз – Ұлттық спорт күні
Бұл күн ұлттық және дәстүрлі спорт түрлеріне арналады. Қалада тоғызқұмалақ, қазақ күресі, асық ату, шахмат және волейбол бойынша жарыстар ұйымдастырылады.
Сонымен қатар театрландырылған қойылымдар, балаларға арналған интерактивті ертегілер, көрмелер мен концерттік бағдарламалар өтеді. Кешкі уақытта Жастар сарайында Н. Молдахметов атындағы қазақ халық аспаптар оркестрінің концерті ұйымдастырылады.
21 наурыз – Ынтымақ күні
Достық пен татулықты дәріптейтін бұл күні қала аулаларында «Наурыз думан» фестивалі өтеді. Қала тұрғындары үшін түрлі мерекелік бағдарламалар, концерттер және көрмелер ұйымдастырылады.
Сондай-ақ «Kostanay Plaza» сауда орталығында ұлттық киім көрмесі, шеберлік сабақтары мен көрме-сатылым өтеді. Кешкі уақытта облыс әкімдігі алаңында үлкен концерттік бағдарлама және мерекелік дискотека ұйымдастырылады. Сонымен қатар Жастар сарайында Қазақстан Республикасының Мемлекеттік академиялық би театрының бір актілі балеттер кеші ұсынылады.
22 наурыз – Жыл басы, Ұлыстың ұлы күні
Наурыз мейрамының негізгі күні облыс әкімдігі алаңында киіз үйлер қалашығының ашылуымен басталады. Алтынсарин көшесінде «Nauryz Street» мерекелік саудасы, ал Сити-орталықта «ART BAZAR» қолөнер бұйымдарының көрмесі мен сатылымы ұйымдастырылады.
Күн бойы театрландырылған қойылымдар, спорттық ойындар, балаларға арналған бағдарламалар және шығармашылық ұжымдардың концерттері өтеді. Мерекелік кеш Қазақстан әншісі Анара Батырханның концертімен жалғасады.
Сонымен қатар облыстық қазақ драма театрында «Наурыз думан» атты концерттік бағдарлама ұсынылады.
Осылайша, Қостанай қаласында Наурыз мейрамы ұлттық дәстүрлерді дәріптеп, мәдениет пен бірлікті насихаттайтын кең ауқымды мерекелік бағдарламамен атап өтіледі.