Қарасу ауданының іскер азаматтары туған жерге жанашырлық танытып, ауылдың көркеюіне қомақты үлес қосуда. Соның бір жарқын үлгісі ретінде Железнодорожный ауылындағы игі істерді мысалға келтірсек дейміз.
«Железнодорожное» АМФ» ЖШС меморандум аясында Железнодорожный ауылындағы Горький көшесін өз қаражаты есебінен қалпына келтіруге кірісті. Кәсіпкер осы жылдың мамыр айында көше бойына 7,5 млн теңгеге еуро қоршау орнатты. Одан кейін, маусым-шілде айларында «ЭПК-форфайт» ЖШС-мен 15 тірек және 15 жарықтандыру шамын орнату жөнінде құны 7,0 млн теңгелік келісім-шарт жасапты.
Қазіргі күні көшені жарықтандыру шаруасы аяқталуға таяды. Ұзындығы 700 метр болатын осы көшеге шілде және тамыз айларында асфальт төсеу жоспарланып отыр. Құрылыс-монтаждау жұмыстарының құны 35 миллион теңге.
Мемлекеттік-жекеменшік әріптестік аясында жүзеге асып жатқан жұмыстардың бір парасы осындай. Жергілікті ЖШС басшысы ауылдың бір көшесін қамқорлығына алып, өз қаражаты есебінен жолын жөндеп, қоршауын орнатып, жарықтандырумен қамтамасыз етуде.
«Қоғамдық маңызы бар мәселелерді шешуде мемлекет пен жеке сектордың өзара серіктестігі тиімді құрал. Маңызды инфрақұрылымды жаңғырту арқылы ауыл халқының өмір сапасын жақсартуға мүмкіндік аламыз,– деп хабарлады Октябрь ауылдық округінің әкімі Нұрсұлтан Қарашев.
Қымбат ДОСЖАНОВА
Суретті Октябрь ауылдық округінің әкімдігі жолдады
Қарасу ауданы