Бүгін Алаш ардақтысы, Айтыс ақтаңгері, даңқты жерлесіміз Айбек Қалиев 46 жасқа толды.
Айбек Киікбайұлы 1978 жылы 19 ақпанда Жанкелдин ауданының Тәуіш ауылында дүниеге келген. 1994 жылы Қаратүбек орта мектебін, 1998 жылы Л.Н.Гумилев атындағы Еуразия Ұлттық университетін үздік бітірген.
– 1998-2001жылдары Қазақ Аграрлық университетінің қазақ тілі кафедрасында ассистент, оқытушы, аға оқытушы;
– 2001-2009 жылдары Л.Н.Гумилев атындағы Еуразия Ұлттық университетінде қазақ әдебиеті кафедрасының оқытушысы, аға оқытушысы, доценті қызметін атқарған;
– 2009 жылдан бері Ы.Алтынсарин атындағы Арқалық мемлекеттік педагогикалық институтының педагогика және филология факультетінің деканы болып қызмет етеді
Айбек Қалиев 2006 жылы «Торғай ақындарының дәстүрлі поэзиясы» атты тақырыпта кандидаттық диссертация қорғады. 2008 жылы «Торғай ақындарының дәстүрлі поэзиясы» атты монографиясы «Нұр-Астана» баспасынан жарық көрді. Республикалық, халықаралық ғылыми конференциялар жинақтарында, ғылыми басылымдарда отызға жуық ғылыми мақаласы жарық көрген. Ол орта мектептің 10-сыныбына арналған гуманитарлық және жаратылыстану бағыттарындағы «Қазақ әдебиеті» пәні оқулығының авторларының бірі. Бұл еңбегі 2010 жылы «Жазушы» баспасында басылып шыққан. Сондай-ақ 9-сыныпқа арналған дәл осындай еңбегі аталмыш баспада басылу үстінде.
Ардақты тұлғаны туған күнімен құттықтай отырып, ұзақ та баянды ғұмыр, зор денсаулық, шығармашылық мол табыс, отбасына амандық тілейміз!