Мемлекет басшысының тапсырмасын орындау мақсатында Қазақстан Республикасының Бас прокуратурасы мен Бас әскери прокуратурасы қаза тапқан және жарақат алған әскери қызметшілердің аналарын қабылдайды. Бұл туралы ҚР Бас прокуроры Берік Асылов өзінің Х әлеуметтік желідегі парақшасында хабарлады.
Берік Асыловтың мәлімдеуінше, әрбір ананың уәжі мен өтініші назардан тыс қалмайды. Қабылдау барысында әскери қызметшілердің қаза табуы мен жарақат алуын болдырмау жөніндегі жұмыстарға, әскери қызметке шақырудың заңдылығы мен медициналық қызметтің қорытындыларының негізділігіне тиісті баға берілмек.
Аталған мәселелер бойынша нақты талдау жүргізу үшін жұмысқа Қорғаныс министрлігі мен Ұлттық ұланның орталық аппараттарының өкілдері тартылған.
Бұл бастама – азаматтардың құқықтары мен қауіпсіздігін қорғау жолындағы нақты қадам. Әсіресе, өз перзентін Отан алдындағы борышын өтеу кезінде жоғалтқан аналарға мемлекет тарапынан көрсетілетін құрмет пен қолдау ерекше маңызға ие.