Меңдіқара ауданында шағын кәсіпкерлік дамып келеді. Кәсіп ашып, іс жасаймын дегендер Ұлттық жоба арқылы грант ұтып немесе төмен пайызбен шағын несие ала алады. Ол үшін 2021-2025 жылдарға 209 млн 750 мың теңге қарастырылған.
Меңдіқара ауданы әкімдігінің жұмыспен қамту оралығының директоры Меңсұлу Садуақасова өткен жылы Ұлттық жоба шеңберінде 249 адам жұмысқа орналасқанын айтады.
– Былтыр 35 жоба мақұлданып, 249 адам уақытша, ал 91-і тұрақты жұмыспен қамтылды. Қысқа мерзімдегі кәсіби оқудан 18 адам өтті. «Бизнес-Бастау» жобасы арқылы 82 адам оқып шықты. Биыл Ұлттық жоба арқылы 207 жаңа жұмыс орны құрылады. Оның 84-і тұрақты. Әлеуметтік аз қамтылған тұрғындар үшін 11 грант беріледі. Жыл басынан бері 3 адам грант ұтып, кәсіптерін бастап кетті, – дейді Меңсұлу Садуақасова.
Уәлижан Ұлтфуллаев өзінің бизнес жобасын сәтті қорғап, мемлекеттен 1 млн 200 мың теңге қайтарымыз грант алған. Ол қаржыға Меңдіқара ауданында тез тамақтану (фаст-фут) орнын ашты.
– Бұл орынды ашқаныма бір жылға таяды. Жобамды сәтті қорғап, грант жеңдім. Ол қаржыға тағамды дайындайтын құрылғыларды сатып алдым. Қазірше орынды жалға алып отырмын, 80 мыңдай төлеймін. Сондай-ақ, бір адамды өзіме көмекші ретінде жұмысқа алдым. Бұйыртса, кәсібімді кеңейтуді көздеп отырмын. Кәуап істеп сатуға мүмкіндік қарастырып жатырмын. Оған бағдарламалар арқылы төмен пайызбен несие берсе алуға дайынмын, – дейді жас кәсіпкер Уәлижан Ұлтфуллаев.
Сәуір айының көрсеткіші бойынша 351 адам жұмысқа орналасқан. Орталық директорының мәліметінше, түрлі бағытта 1500-ден астам адам жұмыспен қамтылмақ.
– Субсидияланатын жұмыс орындарына 156 адам, жастар тәжірибесіне 8 жас, әлеуметтік жұмыс орындарына 22 адам жұмысқа тұрды. “Алғашқы жұмыс орны” жобасына 5 жолдама бар.
Сондай-ақ, 21 мен 35 жас аралығындағы жастарға шағын несие беру көзделіп отыр. Ол қаржы “Аграрлық несиелік корпорация” АҚ арқылы 5 млн теңгеге дейін беріледі.
– Осы жылы 5 несие 25 млн теңгеге берілмек. Қазірдің өзінде 3 адам несие алуға ниетті. Құжаттарын даярлап жатыр, – деді орталық директоры.
Сералы МЫРЗАБАЙ.
Суретті түсірген Бағдат АХМЕТБЕКОВ.
Меңдіқара ауданы