Мемлекет басшысының бастамасымен жарияланған «Таза Қазақстан» экологиялық акциясына ел тұрғындарының үнемі басты назарында. Жыл бойы жалғасатын бұл науқанды арқалықтықтар көктем туысымен тіпті жандандыра түседі.
Әдеттегідей демалыс күні мекемелер мен ұжымдар, үй тұрғындары сенбілікке шығып, қала тазалығына үн қосты. Қолдарына күрек, тырма, сыпырғыш ұстаған тазалық сақшылары көшелер мен көп қабатты тұрғын үйлердің аулаларын қоқыстан тазартып, қалыпқа келтірді.
Тазалық шараларына белсене қатысқан ұжымдардың бірі – Арқалық политехникалық колледжі.
«Тұрған жерінің тазалығына әркім жауапты. Біз өзімізге бекітіліп берілген аумақтың тазалығын ұдайы қадағалап отырамыз.
Бүгін де ұжым болып шығып, бір кісідей ұйымдасқан түрде сенбілікке атсалысып жатырмыз. Барша қала тұрғындарын тазалық шараларына атсалысуға шақырамыз», – дейді колледждің денсаулық сақтау маманы Бәтима Ақансеріқызы.
Тазалық жөнінде жақында қала әкімі Әмірхан Асанов та тұрғындарға үндеу жариялаған болатын. Үндеуге үн қосқан тұрғындардың қатары арта түсуде.
Кезекті сенбілікте қалалық «Үздік аула» жеңімпазы – Абай көшесі №78 үй тұрғындары тағы да асқан белсенділік танытты.
Мұрат ЖҮНІСҰЛЫ
Суреттерді түсірген – автор
Арқалық қаласы