Арқалық қалалық пошта байланысы торабының пошташысы Бану Басар республикалық байқаудың жеңімпазы атанып, дипломмен және «Еңбек озаты» төсбелгісімен марапатталды.
«Қазақстан Республикасы кәсіподақтар федерациясының «Мамандық үздігі» республикалық конкурсының жеңімпазы, жерлесіміз Бану Серікқызы – тәжірибелі маман, ұжымға сыйлы жан.
– Қазақстан кәсіподақ қозғалысының 120 жылдығы және Қазақстан Кәсіподақтар Федерациясының 35 жылдық мерейтойын атап өту барысында осындай жоғары марапатқа ие болып, қуанышымды еселеп отырмын. «Мамандығы бойынша үздік» атағын иелену – мен үшін үлкен мәртебе. Әсіресе, бұл марапатты кәсіподақ қозғалысының мерейтойы қарсаңында алу — екі есе қуаныш. Мен осы салада сегіз жылдан бері еңбек етіп келемін. Пошташының жұмысы — оңай емес. Аяз бен аптап, көктайғақ пен лайсаң күндерде ауыр сөмке асынып, әр үйге хат-хабар жеткіземіз. Бірақ, тұрғындардың шынайы алғысын естігенде, барлық қиындық ұмытылып, еңбегіңнің қадірін сезінесің, – дейді үздік пошташы Бану Басар.
Пошташы болу – мамандық қана емес, халыққа адал қызмет ету. Құрметті мамандық иелері хаттар мен газеттерді, зейнетақы мен аударымдарды уақытылы жеткізіп, тұрғындардың сеніміне ие болып келеді.
– Әсіресе, қарттар бізді асыға күтеді, жаңалық тыңдауға, көмек сұрауға дайын тұрады. Кейде олардың өтінішімен дүкеннен керекті заттарын да ала барамыз. Осындай қарым-қатынас біз үшін де маңызды – ол сенім мен жауапкершілікті арттырады. Федерация бастамасымен ұйымдастырылған бұл байқау әр саладағы еңбек адамының абыройын арттырды. Бұл марапат – тек менің ғана емес, қысы-жазы тыным таппай, әрбір үйге ізгі хабар мен қуаныш жеткізіп жүрген барша әріптестерімнің ортақ жеңісі, – дейді еңбек озаты Бану Серікқызы.
Ол орайлы сәтті пайдаланып өзінің сүйікті ұжымына, жергілікті кәсіподақ ұйымына және әрдайым қолдау көрсететін отбасына шексіз алғысын білдірді.
Мұрат ЖҮНІСҰЛЫ
Суреттерді түсірген – автор