Бүгін Ресей Федерациясының Президенті Владимир Путин Қазақстанға мемлекеттік сапармен келді. Бұл сапар екі ел арасындағы дипломатиялық, экономикалық және мәдени-гуманитарлық байланыстарды одан әрі нығайтуды көздейді.Мемлекеттік сапар ең жоғары деңгейдегі дипломатиялық іс-шара ретінде екіжақты қарым-қатынастардың ерекше мәртебесін көрсетеді. Владимир Путиннің осы сапары Қазақстан мен Ресей арасындағы ұзақ мерзімді серіктестікті одан әрі тереңдетуге бағытталған маңызды қадам болмақ.
Сапар аясында Ақордада екі ел басшыларының ресми кездесуі өтті. Қазақстан Президенті Қасым-Жомарт Тоқаев пен Владимир Путин сауда-экономикалық ынтымақтастық, көлік инфрақұрылымын дамыту және энергетика саласындағы стратегиялық мәселелерді талқылап, маңызды келісімдерге қол қойды.
Сапар барысында екі елдің үкіметтері сауда, инвестиция және өнеркәсіптік кооперация салаларын қамтитын ірі құжаттар пакетін дайындағаны айтылып отыр. Екі жақ экономикалық байланыстарды нығайту үшін бірқатар бірлескен жобаларды талқылады, оның ішінде минералды тыңайтқыш өндірісі – Жамбыл облысындағы «Еврохим» жобасы, автомобиль доңғалақтары мен жүк көліктеріне арналған жабдықтарды шығару, көлік және транзит бағытында халықаралық дәліздер мен инфрақұрылымды дамыту жобалары бар.
Қазақстан мен Ресей гуманитарлық саладағы ынтымақтастықты жалғастырып келеді. 30 жылдық мәдени және ғылыми алмасу дәстүрлеріне сүйене отырып, елдер бірлескен көрмелер, театр гастрольдері мен кино күндерін ұйымдастыруды жалғастыруда. Сонымен қатар, ғылым мен білім беру саласындағы 240-тан астам бірлескен жобаны іске асыру – екі елдің осы саладағы серіктестігін көрсетеді.
Бұл сапар екі ел арасындағы экономикалық және саяси байланыстардың жаңа кезеңін ашады. Атап айтқанда, Қазақстан мен Ресей арасындағы тауар айналымын арттыру, газдандыру және транзиттік дәліздерді дамыту мәселелері талқыланып жатыр. Бұл қадамдар өңірлік тұрақтылық пен экономикалық серіктестікті нығайтуға ықпал етеді.
Владимир Путиннің Қазақстанға сапары көпжақты ынтымақтастықтың барлық аспектілерін қамтып, екі ел арасындағы серіктестікті жаңа деңгейге көтереді деп үміттенеміз. Бұл іс-шараның нәтижелері Қазақстан мен Ресейдің достық әрі өзара тиімді байланыстарын одан әрі нығайтуға бағытталады.
Берікжан Қайыпбай,
ҚРАШМ Ветеринариялық бақылау және қадағалау комитетiнiң
Қостанай облыстық аумақтық инспекциясы басшысы,
“Ауыл” партиясы Саяси кеңесінің мүшесі