Биыл Жітіқара ауданының құрылғанына 95 жыл. Мерейтойға орай ауданда көптеген қызықты іс-шаралар өткелі отыр. Мереке қарсаңында жөндеуден өткен «Жігер» стадионы қайтадан пайдалануға берілмек.
Тұрғындар осы “Пионер” стадионының бір кездері елдің игілігіне қызмет еткен тамаша орын болғанын айтып отырады. Мұнда аудандық балалар мен жасөспірімдер спорт мектебінің тәрбиеленушілері және спортқа жаны құмар, саламатты өмір салтын ұстанушы тұрғындардың барлығы спорттың сан түрімен айналысты. Бұл – қаладағы ең көне стадиондардың бірі. Бүгінде инфрақұрылымы тозған.
«Комаровское Тау-кен кәсіпорны» ЖШС қолдау қаражаты есебінен осы стадионға күрделі жөндеу жүргізіп, жаңадан “Жігер” атауын беру туралы шешім қабылданды. Айта кету керек, бұл спорт нысанын қалпына келтіру жобасын «СпецПСЫ» ЖШС жүргізсе, жалпы құны 158 миллион теңге болатын жобаны «ЮниСтрой» ЖШС мердігер ұйымы жүзеге асырды. Мұнда жасанды жабындысы бар футбол алаңы, ұзындыққа секіру және ядро лақтыру алаңдары, 4 жолақты жүгіру жолы, 100 метрге жүгіру жарыстарына арналған алаң толық қамтылған. Жобада қосалқы құрамдағы ойыншыларға арналған трибуналық орындықтар орнатылып, футбол алаңына су ағызу жүйелері мен стадионға электр жарығы тартылады. Шағын архитектуралық пішіндер орнатылады. Электронды табло, флагштоктар және Олимпиада алауына арналған тостаған орнату жоспарланды. Аумақты абаттандыру жұмыстары да атқарылуда. Жүргіншілер жолы төселеді, кіреберіс арка бой көтеріп, көліктерге арналған тұрақтар жабдықталады.
Жалпы жобаға келсек, жұмыстың басым бөлігі аяқталуға жақын. Алғашында жұмыс қыркүйек айында аяқталады делінгенімен, стадионды тамыз айының соңына дейін пайдалануға беру жоспарланып отыр.
Аудандық балалар мен жасөспірімдер спорт мектебінің директоры Әлібек Мұқанов айтқандай, спорт мектебінің ғимараты да жөндеуден өтіп жатыр. Қазір мұнда да құрылыс жұмыстары қарқынды. Ғимараттың сыртқы жөндеу жұмыстарымен қатар, жылу және кәріз жүйелері ауыстырылу үстінде. Алдағы уақытта онда соңғы үлгідегі пластикалық терезелер орнатылатын болады.
«95 игі іс» акциясы аясында жүзеге асырылып жатқан бұл жобалардың барлығы спортпен шұғылдануға қолайлы әрі жайлы базаға айналады деген үміт бар. Ауданда сұранысқа ие барлық спорт түрлері осында қамтылмақ.
Жасөспірімдер спорт мектебінің базасында 824 оқушыны қамтитын 9 секция жұмыс істейді.
“Жігер” стадионы барлық спортшы мен саламатты өмір салтын ұстанушы жандар үшін спорттық жарыстардың жаңа ошағына айналғалы отыр.
@gazetakm