Қала әкімдігі бүгіннен бастап қалаішілік қоғамдық көлік маршруттарының қозғалыс бағыттарына өзгерістер енгізілетінін хабарлайды. Бұл өзгерістер №8, №10 және №11 бағыттағы автобустарға қатысты.
Атап айтқанда, №8 және №10 автобус маршруттары бұдан былай Назарбаев Зияткерлік мектебіне соқпай, Назарбаев даңғылы бойымен жүретін болады. Аталған шешім жолаушылар тасымалы және жүк автокөлік көлігімен тасымалдау қағидаларына сәйкес қабылданды. Жаңа бағыт бойынша мектептен ең жақын аялдамаға дейінгі қашықтық қолданыстағы нормативтерге сәйкес келеді.
Сондай-ақ, №11 автобус маршрутының қозғалыс сызбасына өзгеріс енгізілді. Енді бұл бағыт Индустриалдық аймаққа бармайтын болады.
Автобустың соңғы аялдамасы Назарбаев даңғылы бойындағы «Промышленная» аялдамасы болып белгіленді.
Қостанай қаласының әкімдігі тұрғындарды жаңа маршрут сызбаларымен алдын ала танысып, өз сапарларын соған сәйкес жоспарлауға шақырады.