Қарасу ауданының 2026 жылдың алғашқы алты айындағы әлеуметтік-экономикалық даму қорытындылары туралы аудан әкімі Қайрат Темірханұлы Оспанов хабарлады.
Оның айтуынша, ауданның жергілікті атқарушы органдары Қазақстанның стратегиялық даму міндеттерін іске асыру бағытында жүйелі жұмыс жүргізуде. Мемлекеттік және салалық бағдарламаларды тиімді орындау, экономиканың тұрақты өсуін қамтамасыз ету, халықтың әлеуметтік әл-ауқатын арттыру және инфрақұрылымды дамыту басты басымдықтардың бірі болып қала береді.
Экономика мен бюджет тұрақты дамуда
Аудан әкімінің айтуынша, есепті кезеңде аудан бюджетінің кіріс бөлігі 103,3 пайызға орындалып, 1 млрд 453,3 млн теңгені құрады. Бұл өткен жылдың сәйкес кезеңімен салыстырғанда 129 млн теңгеден астам өсімді көрсетеді. Бюджет шығыстарының орындалуы 99 пайызды құрап, барлық әлеуметтік міндеттемелер уақытылы орындалды. Бюджет саласы қызметкерлерінің еңбекақысы толық әрі мерзімінде төленуде.
Орташа айлық жалақы 267,5 мың теңгеге жетіп, өткен жылдың сәйкес кезеңімен салыстырғанда 1,9 пайызға артқан.
Ауыл шаруашылығы – аудан экономикасының тірегі
Қайрат Темірханұлының айтуынша, Қарасу ауданы облыстың жетекші аграрлық өңірлерінің бірі ретінде өз әлеуетін сақтап келеді. Биыл жаздық егіс 774,6 мың гектар алқапқа жүргізіліп, оның 676,3 мың гектарына дәнді және дәнді-бұршақты дақылдар орналастырылды.
Соңғы екі жылда аудан диқандары жалпы көлемі 2,2 миллион тонна астық жинап, рекордтық нәтижеге қол жеткізді. Мал шаруашылығы саласында да өсім сақталып отыр. Биыл алты мал қорымын және тоғыз типтік ветеринариялық пункт сатып алуға қомақты қаражат бөлінді.
Инвестиция мен инфрақұрылым
Аудан әкімінің мәліметінше, негізгі капиталға салынған инвестициялар көлемі 5,5 млрд теңгеден асты. Қарасу және Восток ауылдарының су құбыры желілерін қайта жаңарту, жолдарды жөндеу, байланыс инфрақұрылымын дамыту және қоғамдық қауіпсіздікті күшейту бағытындағы ірі жобалар кезең-кезеңімен жүзеге асырылуда.
Әлеуметтік сала – басты назарда
Әкімнің айтуынша, жұмыспен қамту, білім беру, денсаулық сақтау, мәдениет және спорт салаларында мемлекеттік бағдарламалар табысты іске асырылып келеді. «Дипломмен ауылға» бағдарламасы арқылы жас мамандарға қолдау көрсетіліп, жаңа жұмыс орындары ашылуда. Білім беру ұйымдарының материалдық-техникалық базасы жаңартылып, мектептерде жөндеу жұмыстары жүргізілуде.
«Таза Қазақстан» – ортақ жауапкершілік
Қайрат Темірханұлы Оспанов атап өткендей, «Таза Қазақстан» бағдарламасы аясында аудан көлемінде ауқымды абаттандыру жұмыстары жүргізілуде. Биыл мыңнан астам ағаш отырғызылып, көшелер жарықтандырылып, балалар ойын алаңдары салынып, елді мекендердің санитарлық жағдайын жақсарту бағытындағы жұмыстар жүйелі түрде жалғасуда.
Даму қарқыны сақталады
Қарасу ауданының әкімі Қайрат Темірханұлы Оспановтың айтуынша, 2026 жылдың алғашқы жартыжылдығы аудан үшін нақты нәтижелер мен жаңа бастамалардың кезеңі болды. Экономиканың негізгі көрсеткіштері оң өсім көрсетіп, ауыл шаруашылығы, құрылыс, әлеуметтік сала, білім беру, денсаулық сақтау және инфрақұрылым бағытында маңызды жобалар жүзеге асырылуда.
Алдағы уақытта да мемлекеттік бағдарламаларды сапалы іске асыру, инвестиция көлемін арттыру және тұрғындардың өмір сүру сапасын жақсарту бағытындағы жұмыстар жалғасын табады.
Бота Манет