Қалалық «Мұхтасиб Әлмұхамед» мешітінің асханасы пайдалануға берілді. Қазақстан мұсылмандары діни басқармасының 35 жылдығымен тұспа тұс келген және қасиетті рамазан айының қарсаңында еңсе тіктеген мешіт асханасының салтанатты ашылуына алыс – жақыннан құрметті қонақтар көптеп жиналды.
Қостанай облысының бас имамы Бектұрсын Уәлиев, Арқалық қаласының әкімі Әмірхан Асановқұттықтау сөз сөйледі.
Айтыскер ақын Батырлан Сағынтаев арнау жырын орындады.
Ұлттық салт-дәстүрімізге сай ақ жаулықты аналар шашу шашып, халықтың зор ықылас – қошеметімен жаңа нысанның кермесі қиылды.
Мешіттің жаңа асханасында алғашқы болып қала әкімінің отбасы атынан үлкен ас берілді.
Қонақтарға құрмет көрсетіліп, иықтарына шапан жабылды.
Облыстың бас имамаы Бектұрсын қажы Торғайбайұлы ҚМДБ – ның «Алғыс хаттарын» салтанатты түрде табыстады. Діни басқармадан алғыс алғандардың қатарында қала әкімі Әмірхан Асанов, «Алюминқұрылыс» ЖШС бас директоры Абай Мұқанов, «Бірлік және К» ЖШС бас директоры Қазбек Мұқашев, «Арқалық көмір» ЖШС диреторы Сағидолла Аяп және қалалық «Жігер» стадионының директоры Рүстем Шалабаевтар бар.
Ел игілігі үшін қолға алынған іске демеушілік жасаған азаматтарға қала әкімінің сый-сияпаттары тапсырылды.
Ізгілікті іске жылы лебіздерін білдірген ағайындардың да қатары аз болмады.Аманкелді ауданының әкімі Қанат Кеделбаев, тарихи тұлғалардың ұрпақтары Сұлтанғали Оспанов, Тойғанбол Нұрханов және т.б елдің бетке ұстар азаматтары ықылас-пейілдерін білдірді.
Қалалық ардагерлер кеңесінің төрағасы Түбекбай Әубәкіров, Арқалық қаласының құрметті азаматтары Қайырден Тұрсынбекұлы, Шөптібай Байділдаұлы, Бақытжамал Қалтаеваларда мешіт асханасының салынуы барша қала халқы үшін үлкен қуаныш екенін алға тартты.
«Жалпы мұсылмандар үшін қайырлы, берекелі болған рамазан айының қарсаңында мешітіміздің асханасының есігін халыққа айқара ашып отырмыз. Бұл жер тек елдің игілігіне жарайтын орын болсын дейміз. Орайлы мүмкіндікті пайдаланып, осы құрылысқа атсалысқан барша бауырларымызға алғысымызды білдіреміз», – дейді Арқалық қалалық мешітінің бас имамы Нұрхан қажы Бақтыбай.
Мешіт асханасы бір мезетте 500 адамға қызмет көрсетуге лайықталған.
Қала кәсіпкерлерінің көмегімен тұрғызылған құрылысқа 150 миллион теңгедей қаражат тартылған. Сәулетті, кең әрі жарық ғимаратта әруақтарға арналып құран бағышталды.
Осылайша, көптен елдің көкейінде жүрген тағы бір іс түйінделді.
Мұрат Жүнісұлы
Суреттерді түсірген – автор
Арқалық қаласы