Күні кеше Аманкелді ауданында жылу қазандығы жарылып, бірнеше нысан жылусыз қалып, бір адам зардап шеккен еді. Бүгінгі ахуал туралы облыс әкімдігі ақпарат берді.
Хабарламаға сүйенсек, 7 қарашада сағат 01.15-те жылумен жабдықтауды қалпына келтіру үшін Қостанай қаласынан блоктық-модульдік қазандық жеткізілген.
“Атап айтқанда, қуаты 11 кВ болатын 3 КВР 5 қазандығы, 2 су айналдырғыш жіберілді. Бүгін сағат 9:30-дағы жағдай бойынша БМК қазандықтарын орнату жұмыстары аяқталды. Жылу беру жұмыстары жүргізілді. Пәтерлерде жылуды іске қосу мәселесімен үйлерді аралау басталды. Баспаналардағы температура режимі – 18-20 градус. Блок-модульдік қазандық штаттық режимде іске қосылды. Аманкелді ауданы әкімдігі ендігіде мұндай оқиғанға жол берілмес үшін қосымша резервтік құрылғылармен қамтамасыз етеді”, – делінеді ақпаратта.
Ал апаттан жапа шеккен адамның қазіргі жағдайы ауыр, дегенмен сатурация мен қан қысымы бір қалыпты. Науқастың халі дәрігерлердің тұрақты бақылауында ұсталып отыр.