Қарғалы ауылының тұрғындары да тасқын судың зардабын тартып отыр.

Тасқынның өзі кетсе де артына көріксіз ізін, өкініш сызын қалдырды. Табиғи апаттың салдары «ұйық-батпағын» әлі біраз кештіретін тәрізді. Сондықтан қазір арқаны кеңге салар уақыт емес. Оңалдыру, қалыпқа келтіру, тұрмысты түзеу, шығынды түгендеу шаралары да асқан жауапкершілікті талап етеді. Қазір жер-жерде арнайы комиссия дамыл көрмей жұмыс істеп жатыр.

Бұл ауданда Тобыл жағалауындағы Мичурин, Алтырсары ауылдары көбірек зардап шекті. Саяжай қоғамдары су астында қалды. Шығын шаш-етектен. Бірақ, бастысы, адамдар және үй жануарлары аман. Мұның бәрі – алдын ала эвакуациялау жұмыстарының тыңғылықты жүргізілгенінің арқасы.