Жастар сарайында өткен облыстық «Studentvision song and dance contest – 2023» байқауында көрермен қауым ондаған мемлекеттің ән-биімен, мәдениетімен танысты. Колледж ұжымдары әр елдің атынан топқа түсіп, өнер аламанында өзара мықтыны анықтады.
Байқау Қостанай педагогикалық колледж студенттері мен оқытушыларының «Еurovision» ән байқауының баламасы саналатын авторлық жобасы. Оған техникалық және кәсіптік орта білімнен кейінгі білім беру ұйымдарының студенттері “Вокал” және “Хореография” номинациялары бойынша қатысты. Байқаудың негізгі мақсаты – жастардың бойындағы шығармашылық, өнер қабілетін ашып, олардың таланттарын ұштау. Жеті жыл қатарынан «Studentvision song and dance contest – 2023» байқауы өзінің концептуалды идеясының арқасында жер шарындағы алуан түрлі халықтардың тарихы мен мәдениетінен сыр шертіп келеді. Қатысушылар жеке бір мемлекетті таңдап, сол елдің өнерін көрсетеді. Ережеге сәйкес, конкурсты өткен жылғы жеңімпаз ел ресми түрде қабылдайды. 2023 жылы жарысты Түркия қабылдады. Оған Беларусь, Ұлыбритания, Германия, Египет, Зимбабве, Италия, Франция, Қазақстан, Оңтүстік Корея және Қытай елдерінің өкілдері келді. Аталмыш елдердің әні мен биін Қостанай, Рудный, Лисаков қалаларының колледж студенттері көрермен назарына ұсынды.
Байқау тарихында алғаш рет «Хореография» номинациясында 2 қатысушы жеңіске жетті. Олар Түркия (Қостанай педагогикалық колледжі) және Зимбабве (Лисаков техникалық колледжі). «Вокал» номинациясында – Ұлыбритания (Рудный музыкалық колледжі) жеңімпаз атанды. Жүлде иегерлеріне арнайы алғыс хат пен бағалы сыйлық табыс етілді. «Вокал» номинациясының жеңімпазы Даяна Шағатаева байқаудың жоғарғы деңгейде ұйымдастырылғанын айтты.
– Бұл менің алғашқы байқауым десем болады. Ұстазыммен бірге өтініш жібердік. Қатысушылардың барлығы жақсы дайындықпен келгені бірден байқалды. Басында қобалжығаным рас. Алайда, сахнаға шыққан да оның бәрі ұмыт болды. Байқауды ұйымдастырушыларға алғысымды айтамын. Осындай жастардың бағын жағатын байқаулар көп бола берсін, – дейді әнші Даяна.
Бибіт Нұрмұханов