А. Байтұрсынұлы атындағы Қостанай өңірлік университетінде «Қазақстанның конституциялық жаңғыруы: іске асырудың құқықтық тетіктері және институционалдық өзгерістер» тақырыбында дөңгелек үстел өтті.
Іс-шараға мемлекеттік және құқық қорғау органдарының өкілдері, ғылыми қауымдастық мүшелері, экономика және құқық факультетінің студенттері қатысты. Талқыланған негізгі, өзекті мәселелер — 2026 жылғы конституциялық реформаны іске асырудың басым бағыттары және оның құқықтық жүйе мен мемлекеттік билік институттарының дамуына ықпалы болды.
Іс-шара барысында қатысушылар жүргізіліп жатқан конституциялық реформалардың маңыздылығын атап өтіп, заңды қатаң сақтау және құқықтық тәртіп қағидаттарын нығайтудың қажеттілігіне ерекше назар аударды.
Сонымен қатар сарапшылар Конституцияда білім беру, ғылым, мәдениет және технологиялық дамудың стратегиялық рөлін бекіту елдің тұрақты өсуі мен жаһандық бәсекеге қабілеттілігін арттыру үшін берік құқықтық негіз қалыптастыратынын атап өтті. Қазақстанның басты ұлттық байлығы – оның азаматтары — олардың зияткерлік әлеуеті, кәсібилігі, креативтілігі және инновациялық қызметке қабілеті танылатыны туралы айтылды.
Дөңгелек үстел қорытындысы бойынша қатысушылар конституциялық өзгерістерді дәйекті түрде жүзеге асыру заманауи, ашық және болашаққа бағдарланған мемлекеттік даму моделін қалыптастыруға, сондай-ақ елдің тұрақтылығы мен келешек ұрпақтың әл-ауқатын қамтамасыз етуге ықпал ететініне сенім білдірді.