Қостанай облысы Кәсіпкерлер палатасы жанындағы АӨК мәселелері жөніндегі кеңестің кезекті отырысында мал шаруашылығын дамыту және мемлекеттік қолдау тетіктерін жетілдіру негізгі тақырыптар ретінде қаралды.
Облыстық ауыл шаруашылығы басқармасы басшысының орынбасары Ерлік Досмұхамедов субсидиялау жағдайына тоқталды. Оның айтуынша, биыл субсидиялау бағдарламаларына 84,9 млрд теңге бөлінген, бұл 2025 жылмен салыстырғанда екі есеге жуық көп. Қазіргі таңда осы қаражаттың шамамен 50%-ы игерілген.
Өткен жылдардағы қарыздарды өтеу қажеттілігін ескере отырып, ауыл шаруашылығы басқармасы қосымша бюджет өтінімдерін жолдады. Қосымша қаражат бөлу мәселесі мамыр айында өтетін облыстық мәслихат сессиясында қаралады.
Өз кезегінде қауымдастық төрағасы Александр Бородин несие бойынша пайыздық мөлшерлемелерді субсидиялау қарыздарын өтеуді басым бағыт ету қажеттігін атап өтті.
Күн тәртібіндегі екінші маңызды мәселе – аграршылардың мал шаруашылығын жеңілдетілген несиелеу бағдарламаларына қатысуы болды. «Аграрлық несие корпорациясы» АҚ Қостанай филиалының несиелеу бөлімінің басшысы Тимур Мусиннің хабарлауынша, асыл тұқымды импорттық мал сатып алуға өтінімдер қабылдау басталған.
Бағдарлама шарттары:
Сыйақы мөлшерлемесі: жылдық 6%
Несие мерзімі: 7 жылға дейін
Жеңілдік кезеңі: сүтті мал үшін 30 айға дейін, ет бағытындағы мал үшін 24 айға дейін
Меншікті қатысу: кемінде 15%
Бір бас мал құнының лимиті:
сүтті құнажындар – 1,8 млн теңгеге дейін
ет бағытындағы мал – 1,2 млн теңгеге дейін
асыл тұқымды бұқалар – 1,8 млн теңгеге дейін
Бағдарламалар:
«Ігілік» – несие сомасы 1 млрд теңгеге дейін, мал басы 100-ден 500-ге дейін
«Береке» – несие сомасы 5 млрд теңгеге дейін, мал басы 500-ден жоғары
Тимур Мусин өтінімдер бойынша қаржы сәуір айының соңы – мамыр айының басында түсе бастайтынын жеткізді.
Кеңес қатысушылары отандық мал тұқымдарын дамыту қажеттігін атап өтті. Бұл тұқымдар жоғары асыл тұқымдық көрсеткіштерімен қатар, Қазақстанның климаттық жағдайына жақсы бейімделген.
Сондай-ақ, «Жайлау» атты жаңа бағдарлама әзірленіп жатқаны айтылды. Ол жайылымдық мал шаруашылығын дамытуға және отандық мал сатып алуға бағытталады. Бағдарлама бойынша мөлшерлеме жылдық 6% деңгейінде болады.
Қосымша ретінде «Даму» кәсіпкерлікті дамыту қоры арқылы несиелерге кепілдік беру мәселесі қарастырылуда. Бұл фермерлердің қаржыға қолжетімділігін одан әрі арттыруға мүмкіндік береді.