Қостанай облысында өткен «Тасымалдаушы» жедел-профилактикалық іс-шарасы барысында бар болғаны екі күн ішінде жолаушы тасымалымен айналысатын жүргізушілер тарапынан 317 құқықбұзушылық тіркелді.
Рейдтің басты мақсаты — жүргізушілерді жазалау емес, жолдағы қауіпсіздікті қамтамасыз етіп, жолаушылардың өміріне төнетін қауіптің алдын алу болды.
Анықталған заңбұзушылықтардың ішінде 44 жағдайда жүргізушілердің жолаушыларға тиіскені белгілі болды. Сонымен қатар, 7 жүргізуші көлікті мас күйде басқарған, ал 8 жағдай бойынша жүргізушілер қарсы бағытқа шығып кеткен.
25 көлік айыптұраққа қойылды, олардың бір бөлігі шетелдік нөмірмен жүрген. 6 жүргізуші мемлекеттік нөмірлерінен айырылды.
Рейд барысында заңсыз жолаушы тасымалымен айналысқан 20 жүргізуші анықталды. Олардың ішінде екеуі оң жақ рөлі бар көлікпен жұмыс істеген. Осындай құқықбұзушылықтардың бірі Қостанай– Әулиекөл– Сұрған тас жолында орын алды. Toyota Alphard маркалы көліктің жүргізушісі, Астана қаласының тұрғыны, рұқсатсыз 6 жолаушыны тасымалдап жүргені анықталды.
«Біз алаңдатарлық көріністі байқап отырмыз: адамдар рұқсатсыз маршрутқа шығып, ережелерді бұзып, өзге жолаушылардың өміріне қауіп төндіруде. Біздің мақсатымыз — жолаушылар тасымалын қауіпсіз ету», — деді Қостанай облысы ПД ЖПҚБ аға инспекторы Олеся Бабич.
Полиция өкілдері өңір тұрғындарын қырағы болуға шақырып, тек ресми тасымалдаушылардың қызметін пайдалануға кеңес береді. Бұл — тек заң талаптарын сақтау ғана емес, ең алдымен, жолаушылардың өмірі мен денсаулығы үшін маңызды қадам.