Қазақстанда көлік-логистикалық кешеннің қарқынды дамуы жаңа мамандықтарға деген сұранысты арттырып отыр. Осыған орай, Үкімет отырысында Жұмысшы мамандықтары жылы аясындағы іс-шаралар жоспары қаралып, салада 25 жаңа мамандық енгізу жоспарланғаны хабарланды. Бұл туралы Көлік министрі Марат Қарабаев мәлімдеді.
Жаңа мамандықтар
Министрдің айтуынша, көлік және жол құрылысы саласына BIM технологиясын қолдану маңызды рөл атқарады. Бұл технологияны енгізу цифрлық жобалауды, 3D-модельдеуді және «ақылды жолдар» салу жұмыстарын жеңілдетеді. Осы бағытта келесі мамандықтар сұранысқа ие болады:
• Инженер-жобалаушылар (BIM технологиясын меңгерген);
• Цифрлық жобалаушылар;
• Құрылыс роботтарының операторлары;
• Прорабтар (BIM технологиясында тәжірибесі бар).
Сонымен қатар, көлік-логистика саласында ірі тораптарды басқару үшін цифрлық логистикалық карталар конструкторлары мен операторлары қажет болатыны айтылды.
Көлік секторындағы еңбек ресурстары
Қазақстанда 9,7 миллион жұмыспен қамтылған халықтың 772 мыңға жуығы көлік секторында еңбек етеді. Олардың көпшілігі теміржол, автомобиль көлігі, логистика және қоймалау салаларында жұмыс істейді. Жаңа мамандықтардың пайда болуы осы салалардағы еңбек нарығын кеңейтеді және жоғары технологиялық шешімдер енгізуге мүмкіндік береді.
Болашақ мамандарды даярлау
Осы орайда, Қостанай облысы Жол активтері сапаның ұлттық орталығының қызметкерлері оқу орындары мен мектептерге барып, жоғары сынып оқушылары мен студенттерге жолшы, логист немесе басқа да мамандықтарды таңдауға үндеу тастайды. Бұл жастарды жаңа технологиялар мен саланың инновациялық болашағына қызықтыруға бағытталған.