Мемлекет басшысы Қасым-Жомарт Тоқаев Қазақстан халқына арнаған Жолдауында елдегі инвестиция тарту жүйесінің тиімсіздігін сынға алып, бұл бағытта түбегейлі өзгерістер қажет екенін мәлімдеді.
Президенттің айтуынша, қазіргі таңда инвесторлармен жұмыс істеу жүйесі күрделі, шашыраңқы және бюрократиялық сипатқа ие. Бұл жағдай қызметтерді қайталауға, тиімділіктің төмендеуіне және нақты нәтиженің жоқтығына алып келіп отыр.
«Қазіргі қиын жағдайда инвестиция тарту – ең маңызды міндет. Бұл бағытта жаңа тәсілдер қажет. Ұйымдастыру жұмысының толық жауапкершілігі Премьер-Министрге жүктеледі», – деді Мемлекет басшысы.
Тоқаев жаңа министрлік құрудың қажеті жоқ екенін атап өтті, алайда:
«Бірде-бір мемлекеттік органның атауында “инвестиция” деген сөз жоқ. Бұл сала 3-4 мекемеге бөлініп берілген, бірақ нақты шешімдер қабылданбай отыр», – деді Президент.
Осыған байланысты Премьер-Министр Олжас Бектеновке нақты ұсыныстар әзірлеу үшін 10 күн мерзім берілді. Сонымен қатар, Үкіметке инвестиция тарту жүйесін түбегейлі жаңарту бойынша нақты іс-қимыл жоспарын қысқа мерзімде әзірлеу тапсырылды.
Бұл мәлімдеме инвестиция саласындағы құрылымдық реформалардың бастамасы болмақ. Президенттің айтуынша, инвестиция – ел экономикасының дамуы мен тұрақтылығы үшін шешуші фактор болып қала береді.