Арқалықта XXXVІІ «Өнеріміз саған, Қазақстан!» атты облыстық көркемөнерпаздардың халық шығармашылығы байқау – фестивалі қанатын кеңге жайды.
Қазақ жасөспірімдер театрының фойесінде «Шертер» этно-фольклорлық ансамблінің, халық ақыны Қонысбай Әбілдің және жергілікті қолөнер шеберлерінің шығармашылықтарынан көрмелер қойылды.
Ұлы өнер бәйгесіноблыстық мәдениет басқармасы басшысының орынбасары Саят Жүсіпов бастағанқазылар алқасы сарапқа салды.Алқа құрамында облыстық көркемөнерпаздардың халық шығармашылығы мен кинобейнеқор орталығының басшысы Дәмер Қалқаев, Е.Өмірзақов атындағы облыстық филармониясының жастар камералық хорының жетекшісі және дирижері Салтанат Жакаева, филармония әншісі Талғат Молдағалиев және басқа өнер сүлейлері бар. Сахна шымылдығы қатпарлы тарих қойнауынан сыр шерткен «Күлтегіннің монологімен» ашылды. 
ҚР Мәдениет қайраткері, «Құрмет» орденінің иегері Бораш Әбенов жетекшілік ететін халықтық қазақ ұлт-аспаптар оркестрінің орындауындағы күйлер әдеттегідей тыңдарманының құлақ құрышын қандырды. Ы.Алтынсарин атындағы Арқалық педагогикалық институтымен Н.Құлжанова атындағы Торғай гуманитарлық колледжінің біріккен хоры көрерменді сыршыл иірімдерімен елтіп әкетті.
Халық ақыны Қонысбай Әбілдің өлең жолдарымен өрілген әдеби композиция өнер сүйер қауымға ерекше әсер қалдырды.
«Наркескен» дәстүрлі әншілер ансамблі, «Арқа сазы» этно-ансамблі, «Ақбота» халық би ансамблі,домбыра, қобыз, гитара саздары бір арнаға тоғысқан қазақ әндерінің музыкалық композициясы, “Қобызшылар” дуэті, «Жігіттер» триосы өнердің көрігін қыздырды. Жекелеген әншілер Мұратбек Әбдісалықов, ҚР Мәдениет қайраткері Ораз Нұрғали, Әлиман Өмірзақ, Нұржайна Таубалды шырқап салған әндер жұртшылықтың жан дүниесін баурап алды.
Концерттік бағдарламанышеберлікпен тізгіндеген жүргізушілер Думан Елубай мен Айшагүл Айыпқали да қазылар алқасынан ең жоғары баға алды.
Мұрат ЖҮНІСҰЛЫ
Суреттерді түсірген – автор