Өткен апта Амангелді ауданы үшін жаңалықтарға толы болды. Ел ішінде көптеген жұмыс атқарылып, әртүрлі іс-шара өтті.
Ағаштар отырғызылды
Көктем шығысымен аудан орталығын көкжелекке айналдыруға көңіл бөлініп жатыр. Соған орай аудан әкімдігі көптеген пайдалы істі қолға алған. Бұл ретте елден шыққан атымтай жомарт азаматтардың беріп жатқан көмегі аз емес. Жерлесіміз, меценат Сапар Ысқақұлы 140 данаға жуық шырша көшеттерді өз қаражатына әкелді. Экологиялық тұрақтылықты қамту, қоршаған ортаны жасыл желекке айдалдыру мақсатында А.Байтұрсынов көшесіндегі Көпфункциналды туристік кешенге шырша ағаштары отырғызылды. Игілікті іске мекеме, кәсіпорын қызметкерлері бір кісідей қатысты.
— Ауданымыз күн санап әсемденіп келеді. Келелі іс-шаралардан бөлек, қоғамдық орындар мен маңызды нысандар да салынып жатыр. Алайда, осы ретте ескеретін нәрсе табиғатты аялау. Қоршаған ортаның тазалығы мен тұрақтылығы басты назарда. Көгалдандыру жұмыстары мұнымен тоқтап қалмайды. Алдағы уақытта да жалғасын табатын болады, — дейді аудан әкімі Талғат Карбозов.
Сондай-ақ, аудан орталығындағы «Жастар» саябағында орналасқан «Ұстаздар аллеясында» 50 түп ағаш көшеттер отырғызылды. Аталған игі шараға білім бөлімінің қызметкерлері мен ардагер ұстаздар, мектеп түлектері атсалысты.
«Аманкелді барысы – 2023»
Аманкелді Үдербайұлы Имановтың 150 жылдық мерейтойына орай білектілер сынға түсетін, нағыз жігіттіктің сыналар бәйгесі-қазақ күресі «Аманкелді барысы – 2023» турнирі өтті. Турнирді өткізудің басты мақсаты – ҚР Президенті Қасым-Жомарт Тоқаевтың жолдауын, «Рухани жаңғыру» бағдарламасын жүзеге асыру, салауатты өмір салтын насихаттау, «Қазақстан барысы» республикалық турниріне балуандар іріктеу болып саналады. Турнирге 10 ауылдық округтен жас ерекшеліктері мен салмақ дәрежелері ережеде көрсетілген нормативке сәйкес келген балуандар қатысты. Аталған турнирді мемлекеттік әлеуметтік тапсырыс шеңберінде «Жастар кеңесі» қоғамдық бірлестігі төрағасы Бекболат Сақтапбергенұлы өткізді.
— «Аманкелді барысы – 2023» биыл да өз деңгейіне сай, салтанатты түрде өтті. Боз кілемде сен тұр, мен атайын деген жігіттер белдесті. Дәстүрлі түрде жыл сайын ұйымдастырылып келе жатқан ұлттық ойын осы жылы да ерекше болды. Балуандар бір-біріне дес бермеді деуге әбден болады. Нәтижесінде I орынды Бекболат Мұқанов, II орынды Бақтілеу Сабыров иеленді, — дейді. Б.Сақтапбергенұлы.
Мың бұралған бишілер
«29 сәуір Халықаралық Би күніне» орай Қ.Әбенов атындағы аудандық мәдениет үйінде «Сиқырлы би әлемі» атты бишілердің аудандық байқауы өткен болатын. Байқауға аудан, ауыл мектептерінен 14 би ұжымы қатысты. Байқау ережесі бойынша қатысушылар бидің екі түрінен яғни, қазақ биі және еркін тақырыпта өнер көрсетті.
Сымбаты мен сәні жарасқан бишілерді анықтау, оларға әділ баға беру әділқазылар алқасы үшін оңайға соқпады. Дегенмен де шын мықтының топ жарып, дараланып тұратыны айдан анық. Қорытынды бойынша Ы.Алтынсарин жалпы білім беретін мектебінің «Мереке» бишілер тобы жеңімпаз атанды. Көркемдік жетекшісі Данагүл Молдашева. Қазақ биінен I орынды Үрпек ауылынан келген «Сымбат» бишілер тобы иеленді. Еркін тақырып бойынша «Айжұлдыз» бишілер тобы жеңіске жетті.
Жерлесіміз жеңімпаз
Сәуір айының 17-21 күні аралығында Бокстан 2009-2010 жылы туған кіші жасөспірім қыз балалар арасында Қазақстан Республикасының чемпионаты өткен еді. Жарысқа аудан бойынша 3 боксшы қыз қатысып, бақ сынады. Кіші жасөспірімдер мен қыздар арасындағы бокстан III орын Арайлым Сақтағанова бұйырды. Соған орай жас боксшыға аудан әкімі Талғат Карбозов арнайы шақыртумен Алғыс хат табыстады.
Арайлым Ы.Алтынсарин орта мектебінің 6 сынып оқушысы. Жастайынан спорттық ойындарда оза шығып, өзінің еңбегімен танылып жүрген оқушының бірі. Бапкері Ербол Асылханұлының айтуынша жас қыздан күтер үміті көп.
— Жарысқа еліміздің түкпір-түкпірінен спортшылар катысқан болатын. Арайлым қызымыз сан мықтының ішінен оқ бойы оза шыққаны біз үшін үлкен қуаныш. Жас болса да қимылы жылдам, әрбір сәтті қалт жібермей бағдамдай біледі. Болашақта аудан атын асқақтатын спортшы боларына сенімім кәміл, – Е.Сейкенов атындағы спорт мектебінің бокс бапкері Е.Асылханұлы.
Бибіт НҰРМҰХАНОВ