Президенттің Жаңа жылдық құттықтауындағы «Бәріміз бір ел болып Әділетті, Қауіпсіз, Күшті, Таза, Озық Қазақстанды құрып жатырмыз» деген тұжырым – соңғы жылдары жүргізіліп жатқан мемлекеттік саясаттың өзегін дәл сипаттайды.
Бұл жай ғана ұран емес, нақты реформалармен бекітілген бағыт.
Әділетті қоғам құру, ең алдымен, заңның үстемдігін қамтамасыз ету мен адам құқықтарын қорғауға басымдық беруден көрінеді. Мемлекет басшысының құттықтауында атап өтілген «Заң мен тәртіп» қағидатының орнығуы – қоғамда жауапкершілік мәдениетінің қалыптаса бастағанын көрсетеді. Азаматтардың құқықтық сана-сезімінің артуы, мемлекеттік институттарға деген сенімнің нығаюы – әділетті қоғамның басты алғышарттары.
Сонымен қатар қауіпсіз қоғам мәселесі тек құқық қорғау саласымен шектелмейді. Президент сөзінде әлеуметтік инфрақұрылымның дамуы, білім мен денсаулық сақтау нысандарының салынуы, тұрғын үймен қамту, ауылды қолдау секілді бастамалар да қоғамдағы тұрақтылық пен қауіпсіздікті қамтамасыз ететін маңызды факторлар ретінде көрініс тапқан. Әлеуметтік әділетсіздік азайған жерде қоғамдық қауіпсіздік те күшейеді.
Президент атап өткен цифрландыру, жасанды интеллект, ашық мемлекет қағидаттары да әділет пен қауіпсіздікті жаңа деңгейге көтеруге бағытталған. Ашық әрі цифрлық жүйелер сыбайлас жемқорлық тәуекелдерін азайтып, азамат пен мемлекет арасындағы байланысты барынша айқын етеді.
Жалпы алғанда, Мемлекет басшысының Жаңа жылдық құттықтауы қоғамға нақты бағдар береді: әділеттілік – мемлекеттік шешімдердің негізі, қауіпсіздік – әр азаматтың өмір сапасын арттырудың кепілі. Бұл бағыттағы жұмыстар жалғасқан жағдайда, Қазақстанда қоғамдық келісімі берік, заңға бағынатын әрі болашағына сенімді ұлт қалыптасатыны анық.
Кенжеш Оразғалиқызы,
«Қостанай таңы» газетінің директор-бас редакторы