Бейімбет Майлин ауданының Әйет ауылында жастар мен аудан тұрғындары арасында экологиялық мәдениетті қалыптастыруға, белсенді азаматтық ұстанымды дамытуға және салауатты өмір салтын насихаттауға бағытталған аудандық «Плоггинг» экологиялық ойыны ұйымдастырылды.
Табиғатты қорғау мен қоршаған ортаның тазалығына жауапкершілікпен қарауды мақсат еткен шараға ауданның әр түкпірінен келген сегіз команда қатысты. Қатысушылар жарыс барысында өзара бақ сынасып қана қоймай, ауыл аумағын қоқыстан тазартуға үлес қосып, қоғамдық пайдалы істі дене белсенділігімен ұштастырды.
«Плоггинг» — жүгіру немесе серуендеу кезінде қоқыс жинауды қамтитын экологиялық қозғалыс. Мұндай бастама қоршаған ортаға жанашырлық танытып қана қоймай, тұрғындардың денсаулығын нығайтуға да септігін тигізеді.
Ойын қорытындысы бойынша жүлделі орындар келесідей бөлінді:
🥇 І орынды Тобыл жалпы білім беретін мектебінің командасы иеленді;
🥈 ІІ орынға Тобыл кентінің Жастар ресурстық орталығы лайық деп танылды;
🥉 ІІІ орынды Сапар Ерғалиев атындағы мектеп командасы жеңіп алды.
Сонымен қатар ұйымдастырушылар белсенділік танытып, қоршаған ортаны қорғау ісіне ерекше үлес қосқан бірқатар командаларды атап өтті. Олардың қатарында Тобыл жалпы білім беретін №1 мектебі, Красносельское, Әйет және Майское ауылдарынан келген «Белсенді ұзақ өмір сүру» бағдарламасының қатысушылары, сондай-ақ ауылдық әкімдік өкілдері бар.
Іс-шара достық пен ынтымақтастық рухында өтіп, әртүрлі жастағы тұрғындарды ортақ мақсат төңірегіне біріктірді. Қатысушылар табиғатты аялаудың маңызын тағы бір мәрте дәлелдеп, экологиялық жауапкершіліктің әр азаматтың күнделікті өмірінің ажырамас бөлігі болуы тиіс екенін көрсетті.
Осындай игі бастамалар аудан тұрғындарының экологиялық сауаттылығын арттырып, туған жердің тазалығы мен көркеюіне үлес қосуға ынталандырады.