Б.Майлин ауданында көрнекті жазушы, ақын Бейімбет Майлиннің 130 жылдығына арналған мерейтой аясында ұйымдастырылған бұл айтысқа өңірдің ең танымал ақындары шықты.
Айтысты облыстық мәдениет басқармасының басшысы Құралбек Атамұратов құттықтау сөзбен ашты.
“Өтіп жатқан бұл додаға Бейімбет Майлин бабамыздың ұрпақтары да келіп, арнайы қатысуда. Айтыс екі кезеңнен тұрады: іріктеу айналымы мен ақтық сайыс. Қазылар алқасы ақындардың тақырыпты аша білуін, сөз тапқырлығы мен сахна мәдениетін бағалайтын болады”, – деді басқарма басшысы.
Ақындарды сынға алған қазылар алқасының төрағасы, Қазақстан жазушылар одағының мүшесі, ақын, сатирик, журналист, аудармашы Абылай Мауданов болды.
Ақын, журналист, Республикалық «Егеменді Қазақстан» газетінің меншікті тілшісі Нұрқанат Құлабаев пен ақын, журналист Б.Майлин аудандық «Әйет шамшырағы» газетінің бас редакторы Айбатыр Ниязбекұлы бағаларын берді.
Жеңімпаздар мен жүлдегерлер арнайы марапаттармен және жүлде қорымен марапатталды.
“Бұл айтыс қазақ өнерін дәріптеу мен рухани құндылықтарды сақтау жолындағы маңызды қадамдардың бірі болды.Айтыстың мақсаты – Бейімбет Майлиннің шығармашылық мұрасын дәріптеп, қазақ әдебиетіне қосқан зор үлесін жас ұрпаққа жеткізу”, – дейді қазылар алқасының төрағасы Абылай Фазылханұлы.
13 ақын додаға түскен айтыс қорытындысында бас жүлде рудныйлық Ғалымгерей Кенжеғозинге (300 мың) бұйырды.
1-орынды Б.Майлин ауданының намысын қорғаған Мамай Ізтілеу иеленді (200 мың). Арқалықтық Батырлан Сағынтаев 2-орынды еншіледі (150 мың).
Ал 3-орынды қостанайлық Науат Жакатаева мен Қостанай ауданының ақыны Медет Байзақов бөлісті (100 мыңнан).
Арнаулы сыйлық торғайлық Байбатыр Ахметбековтің қанжығасына байланды (100 мың).
Қалған ақындарға қатысқаны үшін 50 мың теңгеден берілді. Сондай-ақ Би-ағаның ұрпақтары барлық ақынға сый-сияпат табыстады.
Толығырақ газеттің алдағы санынан оқи аласыздар.
Жандос Жүсіпбек
Суреттерді түсірген Ерасыл Талғатов