“Mecenat.kz” әдеби байқауының III мауысымына романдарды қабылдау басталды. Өтінімдерді қабылдау 2024 жылдың 14 сәуіріне дейін жалғасады.
“Mecenat.kz” әдеби байқауының ІІІ маусымы ашық деп жарияланып, өтінімдерді қабылдауды бастады. Қазақстан туралы қазақ немесе орыс тілінде жазылған шығармалар қабылданады. Байқауға қатысатын романның көлемі, бос орындармен есептегенде, 150 000-нан 300 000 белгіге дейін болуы шарт. Өтінімдерді қабылдау 2024 жылдың 14 сәуірі күні, сағат 15:00-де (Астана уақытымен) аяқталады.
Байқау ережесіне басқа да өзгерістер енгізілген. Ұйымдастырушылар байқауға қатысушы өтінімді дұрыс, талапқа сай қылып ұсынуы тиіс екенін, өтінімде қандай да бір қателік болса, қатысушы өзі жауап беретінін ескертеді. Байқаудың ережелеріне сай келмейтін, ережені бұзған қолжазбалар байқаудың кез келген кезеңінде шеттетіледі.
Байқаудың жалғыз жеңімпазы болады және ол өмір бойына айына 500 АҚШ долларын алып отырады. Идея авторы және жобаның ұйымдастырушысы – Ерлан Асқарбеков. Жоба меценаты – қазақстандық қаржыгер Тимур Турлов.
Байқау шарттарымен https://mecenatkz.com/ сайтынан таныса аласыздар!