Азаматтық ұстанымымен еріктілік қызметтің дамуына қосқан белсенділігі үшін «Үздік ерікті ұйым – 2024» байқауының жеңімпаздарын қала әкімі Әмірхан Асанов салтанатты түрде марапаттады.
Жыл жеңімпаздары түрлі аталымдар бойынша қала басшысының қолынан сый-құрметке ие болды.
Атап айтқанда «Еріктілерді тәрбиелеудегі ұйым» номинациясына Арқалық политехникалық колледжінің «Жүрек жылуы» еріктілер ұйымы, «Еріктілер ынтымақтастығы» номинациясына Арқалық көпсалалы колледжінің «Феникс» еріктілер ұйымы, «Тұрақты ерікті ұйым» номинациясына Арқалық медициналық колледжінің «Мейірім» еріктілер ұйымы, «Қайырымды ұйым» номинациясына Н.Құлжанова атындағы Торғай гуманитарлық колледжінің «Нағыз көшбасшылар одағы» еріктілер ұйымы ұйымы ие болды.
«Өткен жылы елімізде көктемгі қатты су тасқыны салдарынан болған төтенше жағдайға байланысты қаламызда қиын-қыстау шаққа тап болған отбасыларға оқу орындарынан еріктілер ұйымдары жұмыла қол көмектерін көрсетті. Жастардың ел үшін жасаған ерен еңбектерін елеп лайықты құрмет көрсетіп жатқан қала әкімі Әмірхан Біркенұлына үлкен алғысымызды айтамыз. Келіп жатқан Жаңа жылымыз құтты жыл болсын. Елімізде енді қайтып мұндай төтенше апат-қатерлер болмасын. Жалынды жастарымыздың қатары көбейе берсін», –дейді өңірде алдыңғы қатарлы техникалық мамандарды даярлайтын Арқалық политехникалық колледжіне қарасты «Жүрек жылуы» еріктілер ұйымының жетекшісі Алданыш Байжумина.
Үздіктерден үздік шыққан еріктілер ұйымы ретінде қалалық байқаудың жеңімпазы болып Ы.Алтынсарин атындағы Арқалық педагогикалық институтының «Аманат» еріктілер ұйымы танылды.
Жүлдегер еріктілер ұйымдарына диплом және естелік сыйлықтар табыс етілді.
Мұрат Жүнісұлы
Суреттерді түсірген – автор
Арқалық қаласы