Қостанай аудандық Полиция бөлімінің қызметкерлері бейнебақылау камералары арқылы пневматикалық тапаншадан бір орында тұрған автокөлікке оқ атқан 22 жастағы жергілікті тұрғынды құрықтады.
Құқық қорғау органдары анықтағандай, жас жігіт өзінің танысының көлігінде тұрған пневматикалық тапаншаны алған. Аулада тұрған көліктің жанынан өтіп бара жатып, ол кездейсоқ оқ атып, әйнекке зақым келтірді. Осыдан кейін қаскүнем досымен бірге оқиға орнынан кетіп қалған.
«Алдын ала бағалау бойынша залал мөлшері 150 000 теңгені құрады. Ұсталған адамға қатысты бөтеннің мүлкіне қасақана зақым келтіру фактісі бойынша әкімшілік іс қозғалды. Пневматикалық тапанша тәркіленіп, баллистикалық сараптамаға жіберілді», – деп хабарлайды облыстық ПД баспасөз қызметі.
Қолданыстағы заңнама бойынша құқық бұзушыға 50 АЕК (196 600 теңге) мөлшерінде айыппұл салынады немесе 5-тен 20 тәулікке дейінгі мерзімге әкімшілік қамаққа алынады. Қандай жаза қолданылатынын сот шешеді.