Ы. Алтынсарин атындағы Рудный әлеуметтік-гуманитарлық колледжінің ұжымы жаңа оқытушымен толықты.
Оның кәсіби жолы ерекше. «Болашақ» халықаралық стипендиясының иегері, London School of Economics and Political Science (LSE) магистратурасының түлегі Алдияр Исенов Ұлыбританияда алған білімі мен жинақтаған тәжірибесін енді туған өңірінің жастарына арнамақ.
Алдияр Исенов 2018 жылы әлемге танымал LSE-де «Әлеуметтік саясат және даму» (Social Policy and Development) мамандығы бойынша магистратураны тәмамдаған. Оқуын аяқтағаннан кейін кәсіби жолы бірнеше ел мен түрлі саланы қамтыды. Қазақстанның мемлекеттік органдарында қызмет атқарып, Лондонда әлеуметтік жобаларды жүзеге асыруға қатысты. Сонымен қатар Ұлыбританияның қайырымдылық секторында және коммерциялық жылжымайтын мүлік саласында еңбек етті.
Әртүрлі бағыттарда тәжірибе жинақтағанымен, адамдарға пайда келтіру, білім беру және әлеуметтік салаға үлес қосу оның кәсіби ұстанымдарының өзегінде қалды.
Енді ол осы тәжірибесін оқытушылық қызмет арқылы студенттермен бөлісуді мақсат етіп отыр.
«Болашақ» бағдарламасы маған әлемдік деңгейдегі академиялық білім беріп қана қоймай, білімнің қоғамды дамытудағы рөліне жаңаша көзқарас қалыптастырды. Қазақстанға оралған соң Ы. Алтынсарин атындағы колледжді саналы түрде таңдадым. Мұнда өз пайдамды тигізе аламын деп ойлаймын. Студенттерге халықаралық тәжірибені, әлеуметтік жұмыс саласындағы заманауи тәсілдерді жеткізгім келеді. Ең бастысы – үлкен мүмкіндіктер міндетті түрде алыстан басталмайтынын көрсету. Кейде олар туған қалаңнан басталады», – дейді Алдияр Исенов.
Оның пікірінше, шетелде білім алу – мақсаттың соңғы нүктесі емес, алған білімді ел игілігіне жаратуға мүмкіндік беретін маңызды кезең.
Колледж үшін де халықаралық тәжірибесі бар маманның қатарға қосылуы – оқу үдерісіне жаңа көзқарас енгізуге мүмкіндік. Студенттер әлеуметтік саясат пен адамдармен жұмыс істеудің шетелдік тәжірибесімен танысып қана қоймай, теориялық білімнің нақты өмірде қалай қолданылатынын кәсіби тәжірибесі мол маманнан үйрене алады.
Алдиярдың Рудныйға оралу туралы шешімі де кездейсоқ емес. Ұлыбританияда бірнеше жыл тұрып, білім алып, еңбек еткен ол жинақтаған тәжірибесін туған елінде, әсіресе жас ұрпақпен жұмыс істеу арқылы қолдануды жөн көрген.
Ы. Алтынсарин атындағы Рудный әлеуметтік-гуманитарлық колледжі – Қостанай облысындағы тарихы терең оқу орындарының бірі. Бүгінде білім ордасы педагогикалық және әлеуметтік-гуманитарлық бағыттар бойынша мамандар даярлап келеді.
Ал Рудныйдан шығып, әлемнің жетекші университеттерінің бірінде білім алып, халықаралық тәжірибемен туған қаласына қайта оралған оқытушының колледж ұжымына қосылуы – студенттер үшін маңызды өнеге.
Бұл – білімнің шекарасы жоқ екенін, ал үлкен мүмкіндіктер кейде алыс елдерден басталғанымен, оның нәтижесі туған жерде жалғасатынын көрсететін жақсы мысал.