Құрылтай депутаттарының сайлауына дайындық барысында азаматтарды толық әрі уақтылы ақпараттандыруға ерекше көңіл бөлінуде. Сайлаушылар өздерін қызықтырған барлық сұрақтарға бірнеше ресми ақпарат көзі арқылы жауап ала алады.
Облыстың аумақтық сайлау комиссияларының интернет-ресурстарында сайлауға қатысты қажетті мәліметтер тұрақты түрде жарияланып отырады. Мұнда колл-орталықтардың байланыс нөмірлері, сайлау учаскелері туралы ақпарат және басқа да түсіндірме материалдар орналастырылған.
Сонымен қатар азаматтар 1315 бірыңғай байланыс нөміріне хабарласып, өздерінің қай сайлау учаскесінде дауыс беретінін немесе сайлауға қатысты өзге де сұрақтарын нақтылай алады.
2026 жылғы 7 тамыздан бастап жергілікті атқарушы органдардың ресми сайттарында сайлаушылар тізімінен өзін тексеруге арналған арнайы электрондық сервис іске қосылады. ЖСН енгізу арқылы әрбір азамат өзінің сайлау учаскесінің нөмірі мен мекенжайын анықтай алады.
Сайлау комиссиялары тұрғындарды тек ресми ақпарат көздеріне сүйенуге және сайлауға қатысты мәліметтерді алдын ала нақтылап алуға шақырады.