Ақпарат және мәдениет министрлігіне қарасты мәдениет саласы қызметкерлері арасында өткен дәстүрлі республикалық спартакиада биыл да тартысты әрі жоғары деңгейде ұйымдастырылды.
Еліміздің түкпір-түкпірінен келген театр әртістері, министрлікке қарасты жоғары оқу орындарының оқытушылары мен қызметкерлері, сондай-ақ бұқаралық ақпарат құралдарының өкілдері спорт алаңдарында бас қосып, өзара мықтыларды анықтады.
Бірнеше күнге созылған жарыс бағдарламасы спорттың әртүрлі түрлерін қамтыды. Қатысушылар бірнеше іріктеу кезеңдерінен өтіп, өздерінің кәсіби саладағы ғана емес, спорттағы шеберліктерін де дәлелдеді. Әсіресе тоғызқұмалақ бәсекесі аса тартысты өтті.
Ұлттық зияткерлік ойын бойынша сынға түскен қатысушылар арасында тәжірибелі ойыншылар мен бірнеше дүркін жарыс жеңімпаздары да болды.
Осындай мықтылар бас қосқан додада Қостанай облысының намысын Қостанай телеарнасының журналисі Рахат Сейітхан абыроймен қорғады.
Ол әр кезеңде жоғары ойын өрнегін көрсетіп, байыптылығы мен стратегиялық ойлау қабілетінің арқасында қарсыластарынан оқ бойы озық көрінді.
Нәтижесінде тоғызқұмалақ сайысында жүлделі үшінші орынды иеленіп, өңір қоржынына кезекті жетістікті салды.
Рахат Сейітханның бұл жеңісі – тек жеке жетістік қана емес, сонымен қатар Қостанай журналистикасының мерейін үстем еткен маңызды нәтиже. Күнделікті ақпарат айдынында еңбек етіп жүрген әріптесіміз спортта да табандылық пен жоғары дайындықтың үлгісін көрсетті.
Ұлттық құндылық саналатын тоғызқұмалақ ойынын терең меңгерген журналисттің бұл табысы жастарға өнеге болары сөзсіз.
Спартакиада барысында Рахат Сейітхан өзіне жүктелген жауапкершілікті толық сезініп, Қостанай өңірінің абыройын лайықты деңгейде қорғады. Әрбір партияда салқынқанды шешім қабылдап, қарсыластарының осал тұстарын дәл таба білді. Мұндай жетістікке жетудің артында үздіксіз дайындық, қажырлы еңбек пен ұлттық спортқа деген ерекше құрмет жатыр.
Әріптесіміздің жүлделі орны Қостанай телеарнасы ұжымының ғана емес, облыс тұрғындарының да мақтанышына айналды. Бұл жеңіс өңір өкілдерінің республикалық деңгейдегі жарыстарда бәсекеге қабілетті екенін тағы бір мәрте дәлелдеп, алдағы уақытта бұдан да биік белестерді бағындыруға серпін береді.
Рахат Сейітханды айтулы жетістігімен құттықтай отырып, алдағы жарыстарда да толағай табыстар мен жаңа жеңістер тілейміз. Оның спорттағы және журналистикадағы жетістіктері жастарды салауатты өмір салтын ұстануға, ұлттық спорт түрлерін дамытуға ынталандыратыны анық.
Айша Сейітқан