Ахмет Байтұрсынұлы атындағы Қостанай өңірлік университетінде студенттер құрастырған алғашқы жарыс болиді салтанатты түрде таныстырылды. Ақ матамен жабылған көлік Ғылым күні қарсаңында көпшіліктің көзайымына айналды.
Жоба университет жанындағы Озық машина жасау орталығында жүзеге асқан. Ең қызығы – болидтің әрбір бөлшегі студенттердің өз қолымен нөлден бастап жасалған. Идеядан бастап есептеу, жобалау, құрастыру және сынаққа дейінгі барлық кезеңді жас инженерлер өздері өткерген.
Бұл – тек оқу тапсырмасы емес, нағыз инженерлік сынақ.
Ұйымдастырушылардың айтуынша, мұндай деңгейде жасалған студенттік жарыс көлігі елімізде сирек кездеседі.
Салтанатты рәсімде университет ректоры Сейітбек Қуанышбаев бұл жобаның маңызын ерекше атап өтті. Оның айтуынша, Қостанай бүгінде машина жасау орталығына айналып келеді, ал студенттер тек теориямен шектелмей, нақты өндірістік тәжірибе алуы тиіс.
«Үш жыл бұрын идея ретінде басталған жоба бүгін нақты нәтижеге айналды. Бұл – Қазақстанда жасалған алғашқы кәсіби студенттік болид. Біз болашақта халықаралық жарыстарға қатысуды жоспарлап отырмыз. Бұл тек бастамасы ғана», – деді ол.
Жобаға шамамен 3 миллион теңге жұмсалған. Қазірдің өзінде студенттік команда халықаралық деңгейдегі жарыстарға қатысуға өтінім беріп үлгерген.
Іс-шараға өңір басшылары мен ірі өнеркәсіп өкілдері, соның ішінде KIA QAZAQSTAN және СарыарқаАвтоПром компанияларының жетекшілері қатысты. Олар бұл жобаны жастардың инженерлік әлеуетінің айқын дәлелі ретінде бағалады.
Жобаның ерекше қыры – болидте студенттің өзі рөл де, инженерлік жауапкершілік те қатар атқаруы. 2-курс студенті Дмитрий Федотов бұл тәжірибені өміріндегі ең маңызды кезеңдердің бірі деп санайды.
«Мен электроника бөліміне жауаптымын. Күн сайын бірнеше сағат жұмыс істедік. Бұл жай ғана оқу емес, нағыз инженерлік өмір мектебі болды», – дейді ол.
Болидтің таныстырылу сәті көпшілік үшін нағыз шоуға айналды.
Ғылым, техника және жастардың табандылығы бір алаңда тоғысты.
Шұға ҚОҢҚАБАЙ,
Суреттер ҚӨУ баспасөз қызметі ұсынды