Қостанайда полиция қызметкерлері көлікті басқару құқығынан айырылса да маршруттық автобусты тізгіндеген жүргізушіні ұстады. Бұзушыны «Қорғау» интеллектуалды бейнебақылау және аналитика жүйесінің көмегімен анықтау мүмкін болған.
Полиция департаментінің мәліметінше, ер адам бұрын жүргізуші куәлігінен айырылған, алайда соған қарамастан қоғамдық көлікті жүргізуді жалғастырған. Мұндай әрекет жолаушылар мен жол қозғалысына қатысушылардың қауіпсіздігіне айтарлықтай қатер төндіреді.
Жүргізушіге көлік құралын жүргізу құқығы болмаса да басқарғаны үшін әкімшілік жауапкершілікке тартылды. Қазіргі таңда бұл іс бойынша материалдар сотқа жолданды.
Бұзушы басқарған автобус арнайы тұраққа қойылды.
Құқық қорғау органдары жүргізуші куәлігі жоқ көлік басқару — заңды өрескел бұзу екенін және оның салдары ауыр болатынын еске салады. «Қорғау» сияқты бақылау жүйелері осындай жағдайларды анықтап, жол қауіпсіздігін қамтамасыз етіп келеді.