26 жастағы әйел алаяқтарға қажет сим-карталарды қосып беріп, сол арқылы ақша тауып жүрген. Бұл жағдайды облыстық Полиция департаментінің киберқылмысқа қарсы бөлімінің қызметкерлері анықтаған.
Полицейлердің айтуынша, әйел әртүрлі байланыс операторларынан шамамен 400 сим-картаны іске қосқан. Сол нөмірлерге WhatsApp мессенджерінде аккаунттар тіркеп, кейін ол аккаунттарға кіру мүмкіндігін басқа адамдарға беріп отырған.
Ал ол нөмірлерді кейін интернет-алаяқтар пайдаланған. Олар сол нөмірлер арқылы адамдарға хабарласып, өздерін банк қызметкері, полиция немесе басқа да ұйымдардың өкілі ретінде таныстырған. Сөйтіп азаматтарды алдап, жеке мәліметтерін немесе ақшаларын алуға тырысқан.
Тергеу барысында әйелдің бұл жұмыстан ақша тапқаны белгілі болды. Оған төлемдер криптовалюта арқылы жіберілген. Кейін ол ақшаны банктік шоттарға шығарып отырған.
Тінту кезінде полиция қызметкерлері 6 ұялы телефон, 3 планшет және әртүрлі операторларға тиесілі шамамен 400 сим-картаны тәркілеген.
«Қазір бұл оқиға бойынша қылмыстық іс қозғалды. Тергеу жүріп жатыр. Полиция әйелдің бұл іске тағы кімдердің қатысы бар екенін анықтауда. Алаяқтар көбіне мессенджерлер арқылы хабарласып, бөтен адамдардың атына тіркелген нөмірлерді пайдаланады. Сондықтан бейтаныс адамдарға жеке деректерді бермеңіз, олардың айтуымен ақша аудармаңыз», – деп ескертеді полиция.