Бүгін агро өнеркәсіптік саласындағы халықаралық көрмелер мен конференциялардың республикадағы жетекші ұйымдарының бірі Қазақстанның «EXPO TIME» компаниясы облыста «Jańa Dala / Green Day ‘2024» мамандандырылған көрсетім-көрмесін бастады.
Екі күнге жалғасатын іс-шара «Қарабалық ауыл шаруашылығы тәжірибе станциясы» ЖШС-мен бірлесіп, «Қазақ тұлпары» ЖШС мен Қостанай ауданы, Осиновка кентінің алқаптарында ұйымдастырылып жатыр.
«Қазақстандық Дала күні – агробизнестегі заманауи ауыл шаруашылығы технологиялары мен өнімділігі жоғары техниканың мүмкіндіктерін, ветеринария, селекция, өсімдіктерді қорғау және органикалық егіншілік саласындағы жетістіктерді көрсететін өңірдегі ең ірі көрсетім алаңы. Облысымызда мамандандырылған көрме осының алдындағы Ақмола облысында өткен «Jańa Dala / Green Day ‘2024» ауқымды Дала күнінің қисынды жалғасы іспеттес. Бұл іс-шара Қазақстаннан, жақын және алыс шетелдерден келген 200 – ден астам компанияны, АӨК мен агробизнестің кәсіби мамандарын жинап отыр», – деді облыс әкімі Құмар Ақсақалов жиынның ашылуында.
Дала күнінде өңірдің фермерлері мен агроқұрылымдары үшін аса маңызды іс шаралардың қатарызаманауи ауыл шаруашылығы техникалары мен жабдықтардың көрсетімі болмақ.
Онда ұйымдастырушылар топырақты өңдеу, егіс жұмыстары, мелиорация мен суару үлгісін таныстырып жатыр. Олардың арасында малшыларға арналған техникалық жабдықтар да қойылған.
Жетекші селекциялық станциялардан жоғары өнімді және сапалы ауылшаруашылығы дақылдарының сорттары себілген жер телімдері үлгі етіп алынуда.
«JańaDala / GreenDay ‘2024» көрсетім-көрмесіне қатысушылар өсімдік шаруашылығы, мал шаруашылығы, техника мен жабдықтарды өндіру және жеткізу, органикалық егіншілік – ауыл шаруашылығы өндірісі мен аграрлық бизнесті байланыстыратын барлық салаларда мол тәжірибелерімен бөліспек.
Суреттерді түсірген Б.Көркембаев