Бүгін облыста Ауыл шаруашылығы қызметкерлерінің күніне арналған салтанатты іс-шара өтті. Жиынға сала мамандары, кәсіпкерлер мен жергілікті билік өкілдері қатысты.
Облыс әкімі жерлестерін кәсіби мерекелерімен құттықтап, ауыл еңбеккерлерінің еңбегін жоғары бағалады.
«Бүгін біз еліне адал қызмет етіп, еңбегін сүйген, туған жерге жанашырлық танытқан адамдарға құрмет көрсетіп отырмыз», — деді ол.
Өңір басшысы Мемлекет басшысының Астанада өткен форумда қойған стратегиялық міндеттерін еске салды. Ауыл шаруашылығы экономиканың маңызды саласы ретінде дамуы, агроөнеркәсіптік кешеннің цифрлық трансформациясы, инфрақұрылымды жаңғырту және бизнестің ауылды жандандырудағы белсенділігі ерекше назарда екені айтылды.
Қостанай облысында кәсіпорындарды техникалық қайта жарақтандыру, өсірілген өнімді өңдеу жобалары жүзеге асырылуда. Мемлекет басшысының тапсырмасымен ауыл шаруашылығы құрылымдарына жаңа қолдау бастамалары енгізілуде. 2025 жылы салаға 207 млрд теңге бөлінді. Бұл өткен жылмен салыстырғанда 60%, ал 2023 жылмен салыстырғанда екі есе көп. Осы қолдаудың арқасында 7 млн тоннадан астам дән жинақталып, соңғы он жылдағы ең жоғары көрсеткішке жетті.
2024 жылдан бастап «Ыңғайлы лизинг» бағдарламасы іске қосылды. Биыл республика бойынша 250 млрд теңге бөлініп, ауыл шаруашылығы кәсіпорындары 960 техника мен жабдықты 34 млрд теңгеге сатып ала алды. 2025 жылдың қорытындысы бойынша, облыстағы ауыл шаруашылығы өнімінің жалпы көлемі 1 трлн теңгеден асты.
Облыс әкімі экономика адамдарға негізделгенін, ауылды кешенді дамыту қажеттігін айтты. Соңғы үш жылда облыс бюджетінен ауыл тұрғындарына қолайлы өмір жағдайын жасауға шамамен 254 млрд теңге бөлінген. Бұл алдыңғы үш жылмен салыстырғанда екі есе көп. Жобалар аясында сапалы ауыз су, тұрғын үй, мектеп, балабақша, медицина және спорт нысандары салынып жатыр.
Құмар Ақсақалов ауыл кәсіпорындары мен кәсіпкерлердің ауылды дамытуға қосқан үлесін ерекше атады. Мысалы, Қостанай ауданындағы «Аян-озат» ЖШС, «Александровское» ЖШС, Қамысты ауданындағы «Алтынсарино» ЖШС, Ұзынкөл ауданындағы «Мирас» шаруа қожалығы, Денисов ауданындағы «Фрунзенское» ЖШС толайым жетістікке жеткен. Бұл кәсіпорындар ауылды абаттандыру, тұрғын үйлер салу, спорттық және мәдени инфрақұрылым дамыту, өндірісте заманауи технологияларды енгізу арқылы өнімділікті арттырумен айналысады.Мал шаруашылығын дамытуға ерекше көңіл бөлініп, заманауи жоғары технологиялы сүт фермалары салынып жатыр. 2025–2027 жылдары облыста 93 жаңа инвестициялық жоба іске қосылады деп жоспарланған. Олардың жалпы құны – 383 млрд теңге, 11 сиыр фермасы, 16 суармалы жер және 3 көкөніс сақтау қоймасы салынады. Өңдеуші салада 18 жоба іске асырылып, 3 мыңға жуық жаңа жұмыс орны құрылады.
«Сіздердің еңбектеріңіз әрдайым ерекше құрметке лайық. Алға қойған мақсаттарымыздан таймай, бірге жаңа белестерге жетеміз. Отбасыларыңыз аман, егістеріңіз мол және жемісті болсын!» — деп сөзін аяқтады облыс әкімі.
Іс-шара соңында ауыл шаруашылығы саласында ерекше еңбегімен көзге түскен мамандар мен белсенді кәсіпкерлерге марапаттар табыс етілді.