Көлік министрлігі «Әуе көлігімен жолаушыларды, багажды және жүктерді тасымалдау қағидаларына» өзгерістер мен толықтырулар енгізу туралы бұйрық жобасын әзірлегенін хабарлады.
Бұл жоба Қазақстан Республикасы Көлік министрлігі 2015 жылғы 30 сәуірдегі Қазақстан Республикасы Инвестициялар және даму министрінің №540 бұйрығымен бекітілген.
«Ұсынылып отырған түзетулер жолаушылардың құқықтарын қорғауды күшейтуге, қызмет көрсету сапасын арттыруға және қолданыстағы нормаларды әуе тасымалы саласындағы заманауи талаптарға сәйкестендіруге бағытталған. Атап айтқанда, музыкалық аспаптарды тасымалдау тәртібін нақтылау көзделіп отыр. Жобаға сәйкес, белгіленген талаптар сақталған жағдайда оларды қол жүгі ретінде, жеке жолаушы орнына орналастырып немесе тіркелген багаж ретінде тасымалдауға мүмкіндік беріледі. Сонымен қатар, қорғаныш қаптамасына салынған музыкалық аспаптарды, оның ішінде домбыра мен қобызды ұшақ салонында тасымалдауға рұқсат беру ұсынылады. Бұл ретте олардың өлшемі 110×35×30 см-ден, ал салмағы 10 келіден аспауға тиіс», – делінген ресми мәлімдемеде.
Сондай-ақ, жоба аясында әуе компаниялары белгілеген талаптарға сәйкес жануарларды ұшақ салонында тасымалдауға мүмкіндік беру қарастырылған. Бұдан бөлек, мүгедектігі бар жолаушыларға әуе тасымалы кезінде жеңілдіктер беру нормасын заңнамалық деңгейде бекіту ұсынылады.
«Құжатта әуе кемесі сыйымдылығы төмен басқа әуе кемесіне ауыстырылған жағдайда жолаушыларды орналастырудың басым тәртібі де енгізілмек. Осыған сәйкес, бірінші кезекте кәмелетке толмаған жолаушылардың, мүгедектігі бар адамдардың, ауыр науқастардың, жүкті әйелдердің және зейнет жасындағы азаматтардың тасымалы қамтамасыз етіледі. Жолаушылардың құқықтарын қорғауды күшейту мақсатында жолаушыны жеткізудің кешігуіне байланысты айыппұлды төлеудің нақты мерзімін белгілеу ұсынылады. Яғни, тиісті өтініш берілген күннен бастап төлем 10 күнтізбелік күннен кешіктірілмей жүзеге асырылуға тиіс. Сонымен қатар, тасымалдаушының кінәсі дәлелденген жағдайда тіркелмеген қол жүгінің бүлінуіне байланысты әуе компанияларының жауапкершілігін белгілеу көзделген», – дейді министірлік өкілдері.
Ұсынылып отырған өзгерістер қабылданған жағдайда әуе тасымалының ашықтығы мен қолайлылығы артып, саланың әлеуметтік бағыты күшейіп, еліміздегі жолаушылардың құқықтарын қорғау деңгейі одан әрі жақсар түспек.
Нормативтік құқықтық актінің жобасы көпшілік талқылау үшін «Ашық НҚА» интернет-порталында орналастырылды. Барлық мүдделі тұлғалар құжатпен танысып, белгіленген тәртіппен өз ұсыныстары мен ескертулерін жолдай алады.