Рудныйда халықаралық «Қазақ тілі» қоғамының ұйымдастыруымен «Дарабоз» интеллектуалды ойыны өтті. Сайыстың қазақ тілінің дамуына, оның мәртебесін арттыруға және ұлттық рухты көтеруге септігі зор.
Бұл ойын тек бәсекелестік тұрғыдан ғана емес, сонымен қатар қазақ тілінің мәртебесін, оның ғасырлар бойы жинақталған терең тарихын насихаттауға бағытталған.
Ойынға қатысқан командалардың әрқайсысы өздерінің білімдері мен шеберліктерін, шығармашылық таланттарын көрсете отырып интеллектуалдық тапсырмаларды орындады. Тапсырмалар қазақ халқының салт-дәстүрі, мәдениеті мен әдебиеті және тарихын қамтыды.
«Халықаралық «Қазақ тілі» қоғамы ұйымдастырған кезекті «Дарабоз» ойыны өтті. Мұндай іс-шаралар ұлттық рухты көтеріп, қазақ тілін дамытуға үлкен үлес қосады. Қатысушылар мен көрермендер ерекше әсерде болды. Бұл ерекше ойын тек бәсекелестік рухын ғана емес, сонымен қатар қазақ тілінің мәртебесін арттыруға, тілдің қолданыс аясын кеңейтуге бағытталған. Сайыс әр айдың соңғы жұмасында өтіп тұрады. Бұл сайысқа студенттерден бастап ересек яғни, зейнет жасындағы адамдарға дейін қатыса алады. Ойын өте қызықты. Бас-аяғы бір жарым сағатқа созылады. Жайлы орта қалыптасқан. Бұл ойын кеншілер қаласында жақсы дамып келеді. 2025 жылы да «Дарабоз» ойынының жалғастырып, оған тағы да көптеген қатысушылар жиналатынына сенімдіміз. қатысушыларға алғыс білдіреміз», – дейді сайысты ұйымдастырушы, халықаралық «Қазақ тілі» қоғамының Рудный қаласы филиалының төрайымы Қымбат Бірманова.
Жарыстың қызу кезеңінен кейін жеңімпаздар анықталды. 2024 жылғы «Дарабоз» ойынында бас жүлдені SEVEN командасы иеленсе, екінші орынды Тәуекел командасы, үшінші орынды Ардагерлер командасы жеңіп алды. Жеңімпаздарға дипломдар мен ақшалай сыйлықтар табысталды. Бірақ шындығында, осы ойынға қатысқан барлық командалар жеңімпаз болды, себебі олар өздерінің қазақ тіліне деген махаббатын, білімдерін және шеберліктерін көрсете білді.
Сералы МЫРЗАБАЙ
Суреттерді ұсынған – Қымбат Бірманова