Бүгінде 300 орындық жайлы мектептің құрылысына әзірлік шаралары басталып кетті. Қазіргі таңда жер учаскесі нақтыланып, аумақты тазарту және қоршау жұмыстары жүргізілуде. Мердігері – жергілікті құрылыс компаниясы «Алюминқұрылыс» ЖШС.
«Жайлы мектеп» ұлттық жобасы Мемлекет басшысының тапсырмасы бойынша мектеп инфрақұрылымын жаңғырту үшін әзірленгені белгілі. Жалпы, 2023-2025 жылдары елімізде 401 жайлы мектеп салу жоспарланып, барлық жобаны іске асыруға республикалық бюджеттен 2,6 трлн теңге бөлінген. Бұл жоба мектептердегі орын тапшылығын болдырмауға, апатты жағдайдағы және үш ауысымды мектептер мәселесін шешуге бағытталған.
Жайлы мектеп қажетті оқу жабдықтарымен, түрлі пәндік кабинеттермен, бейнебақылау және дыбыстық хабарлау жүйелерімен, пәндік кабинеттермен, компьютерлік сыныптармен, зертханалар мен шеберханалар, сондай-ақ оқушылардың оқулықтары мен жеке заттарын сақтауға арналған шкафтармен қамтылады.
«Елімізде биыл Ұлттық жоба арқылы жоспарланған мектептердің құрылысы «Жол картасы» бойынша 2023 жылдың 29 мамырында бір мезетте бастау алады. Соған байланысты біз де әзірлігімізді шыңдап, бүгіннен бастап мектеп салынатын аумақты тазарту және қоршау жұмыстарын бастап кеттік. Арнайы бейнекамералар орнатылып, құрылыстың барысын онлайн жүйеде бақылауға мүмкіндік жасалады. Жаңа білім ошағы үш қабатты болады. Үлкен спорт залы, асханасы, мәжіліс залы, тынығу аймағы салынады. Нысан 2024 жылдың қыркүйек айында пайдалануға берілмек. Өткен аптада жобалаушылар келіп кетті. Бұл жерде жобаны өзіміз жасаймыз, өзіміз саламыз. Бәрін аяқтап болған соң кілтін тапсырамыз. Құрылыстың іргетасы қаланса, жұмысшылар қатары біртіндеп көбейе береді. Алдымен кірпіш қалаушылар, ағаш шеберлері іске кіріседі. Қабырғасы қаланысымен іле ішкі әрлеу жұмыстары басталады. Бұған дейін Қарасу ауданында мектеп салған тәжірибеміз бар. Құрылысты жүргізуге толық мүмкіндігіміз бар деп айта аламыз», – дейді «Алюминқұрылыс» ЖШС басшысының құрылыс жөніндегі орынбасары Дархан Әбдіков.
Осылайша, Арқалықта жайлы мектептің құрылысы басталғалы жатыр. Ұлттық жобаны іске асыру – балалардың жақсы білім алуына жасауға мүмкіндік бермек.
Мұрат Жүнісұлы.
Арқалық қаласы.