Арқалықтықтар ауыл шаруашылығы күнін атап өтті. Салтанатты жиын өтіп, қала әкімі Әмірхан Асановпен облыстық ветеринария басқармасының басшысы Ахат Шектібаев еңбек майталмандарын марапаттады.
Мерейлі сәтте агроөнеркәсіп кешені қызметкелерінің арасында ҚР Ауыл шаруашылығы ардагерлер Кеңесі атынан «Құрметті ардагер» медалімен, ҚР Ауыл шаруашылығы министрлігінің, облыс, қала әкімдерінің Құрмет грамотасымен марапатталғандар қатары аз болмады. Олардың қатарында «КазАгрофум»ЖШС машина паркінің меңгерушісі Әбдімәжит Смағұлов, «Карина С» шаруа қожалығының басшысы Сабирбек Омаров, «Бірлестік» шаруа қожалығының басшысы Қанат Шубай, «Бірлік-К» ЖШС бригадирі Жұмажан Жүсіпов, «КЭБ» шаруа қожалығының басшысы Кенжебай Өтегеновтер кеуделеріне медаль тақса, «Надежда-К» шаруа қожалығының басшысы Сергей Лялько министрліктің марапатын иеленді.
Жалпы, Арқалық қаласы бойынша 327 шаруа қожалығы, 44 ЖШС және 3 мемлекеттік заңды тұлғалар өз қызметін жүзеге асырады. Оның ішінде мал шаруашылығымен 18 жауапкершілігі шектеулі серіктестік, 126 шаруа қожалығы айналысады. Дәстүрлі жыл айрығындағы іс-шарада қала әкімінің орынбасары Абзал Тәшімов баяндама жасап, қол жеткен табыстар мен алда тұрған міндеттерді саралады.
2023 жылғы 1 қазандағы ауыл шаруашылығы өнімдерінің жалпы шығарылымы 21 млрд 555 млн 200 мың теңгені құрады. Осы жылы атмосфералық құрғақшылыққа байланысты жауын-шашынның жеткіліксіздік салдарынан өсімдіктердің өсуі мен дәннің толық қалыптасып дамуы үшін қолайсыз жағдай орын алды. Керісінше, егін орағы қарсаңындағы жауын-шашынның молдығы астық сапасына зор әсер етіп, егіс алқаптары дәндерінің қайта көктеп кетуіне себеп болды. Қолайсыз ауа-райы және ақбөкендердің жүру жолдарындағы егістік жерлердің зиян шегуіне байланысты дәнді және майлы дақылдар егістігінен барлығы 21 мың 153 гектар егін ору есебінен шығарылды.
Жылдың бір ерекшелігі өңірде көкөніс, бақша егістіктері ұлғайып шаруашылықтар жақсы өнім алды. Атап айтқанда: Екідің ауылынан«SUSAR-ARK» ЖШС, Ашутасты ауылынан «Бижан» және «Айша» жеке кәсіпкерліктері табысқа кенелді. Қазіргі таңда қаланың «Западный» кентіндегі көкөніс қоймасында 80 тонна өнімдері сақталып тұр. Қалада жыл басынан бері арзандатылған бағамен 45 жәрмеңке өткізіліп, 66 мың тоннаның өнімі саудаланды. Оның қаржыға шаққандағы жиынтығы 121 млн теңгені құрайды. Салтанатты жиын одан әрі «Дархан дала еңбеккерлері» атты ауыл шаруашылығы қызметкерлері күніне арналған мерекелік концертке ұласты.
Сондай-ақ, өңір өнім өндірушілерінің ауыл шаруашылығы көрмесі көпшілік назарына ұсынылды.
Мұрат ЖҮНІСҰЛЫ