Қысылғанда қол үшін беру халқымыздың қанында бар қасиет. Әрі-беріден соң бұл адамзат баласының бәріне тән ғадет болса керек. Бірақ, адамның бәрі бірдей емес. Елдегі ағайын тасқын судың зардабын тартып жатқанда, біреулер қарақан басының қамын ойлап, жұрттың үстінен пайда табуды көздеуі көңілге кірбің ұялатты.
Тізе берсек, келтіретін мысал көп. “Жақсыны көрмек үшін” демей ме халқымыз, Жанкелдин ауданына барған сапарымызда ел азаматтарының қайырымдылық істерін көріп марқайдық.
Арқалық-Торғай бағытындағы тас жолдың Тәуіш ауылындағы тұсы, одан әрі Қисықарасу бөлігін су жырып, асфальт төселген жолдың күл-паршасын шығарғаны көпшілікке мәлім. Әрлі-берлі жолаушылап жүрген халық осы тұсқа келгенде дағдарып қалады.
Бұрын тақтайдай тегіс жолмен Торғайға әп-сәтте жетіп барушы еді. Осындай қиын сәтте екі араға қатынап жүрген такси жүргізушілері жүру құнын төмендетті. Бұл, әрине, өз-өзін жұмыспен қамтып, бала-шағасының нәпақасын айырып отырған азаматтар үшін оңайға соқпасы анық. Алайда, тәуекелге барып, ауылдастарын арзан бағаға тасып жүрген жігіттер ағайынның ақ батасына кенеліп отыр.
Тәуіш ауылының тұрғыны Қайсар Фазылов бес-алты жылдан бері жолаушылар тасумен айналысады. Ол су тасқыны кезінде жолаушыларға салмақ салған жоқ. Бергенін алды. Тіпті, кейбірін барар жеріне тегін апарып тастаған кезі де болған.
“Мұндай жағдайды ешкім күтпегені анық. Халық бір сәтте абдырап қалды. Бірақ, әркімнің шаруасы бар. Кейде науқас кісілер жол азабына қарамай жолаушылап шығады. Қалай көмектеспейсің? Кейбіреуін тегін апарып тастаймын. Кейде такси құнынан төмен ақша ұсынатындар болады. Оларға да түсіністікпен қараймын. Елдің жағдайы әлі дұрысталар, бастысы халқымыз аман болсын!”, – деп ағынан жарылды Қайсар Фазылов.
Қайсар тәрізді елдің жағдайын ойлап, табысын кейін ысырған қайсар азаматтар тұрғанда ел ішінің ынтымағы жарасып, ырысы молая түсері хақ.
Әлібек ЫБЫРАЙ
Суреттерді түсірген Бейбіт МЕЙРАМҰЛЫ
Жанкелдин ауданы