Жаңа жыл қарсаңында Арқалық қана емес, көршілес Аманкелді, Жанкелдин аудандарынан келушілерге медициналық қызмет көрсететін «Жақсылық» оңалту орталығы заманауи жөндеуден өткен жаңа ғимаратқа көшіп, жұмыс ауқымын кеңейтті.
Қалада 2020 жылдан бері жұмыс істейтін бұл орталық бұрынғы орналасқан ғимаратының тар болуына байланысты емдік оңалту қызметтерін толық көрсете алмай келген болатын. Енді, міне, байырғы отбасылық дәрігерлік амбулаторияның ғимаратын иеленіп отыр.
Орталықта балаларға және ересектерге массаждың, физиоемнің барлық түрлері көрсетіледі. Заманауи қондырғылар орнатылған. Науқастар неврология, травмотология, ортопедия, хирургия, педиатрия, терапия және нейрохирургиялық емдерді тегін алатын болады.
Мұнда осы кезге дейін 40-50 науқас ем алып келсе, жаңа ғимаратқа көшуінің арқасында енді күніне 80-100 адамға дейін қабылдай алады. Орталықта оңалту емінің тәуліктік бөлімі, күндізгі бөлімі және терапеялық емнің күндізгі бөлімі жұмыс істейтін болады.
Жұмыс ауқымын кеңейтіп, жайлы қонысқа көшіп, өз істеріне зор ынтамен кіріскен ұжымға қала әкімі Әмірхан Асанов сәттілік тіледі.
«Еліміздің басты байлығы адам капиталы десек, тұрғындарымыздың денсаулығын сақтау өте маңызды іс. Олай болса, Сіздерді заманға сай оңалту қызметтерін көрсететін орталықтың ашылуымен құттықтаймын.
Жалпыға белгілі, Арқалық қаласының, Аманкелді және Жанкелдин аудандарының халқы оңалту емін алу үшін кезектерін ұзақ күтіп, Қостанай, Астана сияқты еліміздің ірі қалаларына баруға мәжбүр болатын. Енді, бұл қиындық артта қалды», – деді қала әкімі Әмірхан Асанов.
Оңалту орталығында физиоемнің, емдік массаждың, емдік дене шынықтырудың және адаптивті дене шынықтырудың барлық түрлерімен қоса, сумен емдеу яғни, балаларға бассейн, гидрованна, ересектерге қолға және аяққа гидромассаж жасалады. Емдік дене шынықтыруға қажетті Ерго терапия аппараттары, Еуропаға кең танылған «РЕДКОРД» аппараты орнатылған.
Жаңадан ашылған «Жақсылық» оңалту орталығының орналасқан жері – Арқалық қаласы, Шақшак Жәнібек көшесі №93 үй.
Мұрат ЖҮНІСҰЛЫ
Суреттерді түсірген автор
Арқалық қаласы