Келесі жылы Жанкелдин ауданы Шеген ауылында аудандық спартакиада өтеді. Соған қарсы біраз ауқымды жұмыс жоспарланған. Ескі стадионды жөндеу үшін жобалық-құндық құжаттары әзірленіп жатыр. Егер жаңа жылға дейін бекітілсе, келесі көктем айларынан бастап стадионды қалпына келтіру жұмыстары жүргізіледі. Мұның сыртында Спорт алаңдары, балалардың ойын алаңдары бой көтермек. Соңғысын ауылдағы шаруа қожалықтары бірігіп істеп беретін болды. Бір шаруа қожалығы ауыл кіреберісіне қақпа орнатпақшы. Бұл шаруақор азаматтармен алдын ала жасалған меморандумның жемісі.
Өткен ғасырдың сексенінші жылдары елді мекенде жаңадан мектеп салынғанда қасынан типтік үлгідегі екі қабатты интернат қоса пайдалануға берілген еді. Оның да бос, қаңырап тұрғанына ұзақ жыл болды. Осы нысанды кәсіпкер Бақытжан Бейсенов сатып алып, ауылдастарының игілігіне бермекші.
–Бақытжан ініміз ауылға мешіт салып бергенін өздеріңіз білесіздер. Енді интернаттың құжаттарын әзілеп, оған 50 млн теңге құюды жоспарлап отыр. Біз оны кәсіпкерге ұзақ жылға өтеусіз жалға береміз. Әзірге құжаттарын реттеп жатыр. Үлгірсе биыл ғимараттың шатырын жөндеп, черепицамен жауып, пластик терезелерін орнатып қоямын деген. Келесі жылы нақты іске кіріспек. Екінші қабатта фитнес-орталық, балалардың шағын орталығы, күрес залы болады. Бірінші қабаттың бір қанатында замануи кафе, екінші қанатында наубайхана, сауна, шаштараз сияқты әлеуметтік нысандар орналасады. Нысан бір орталықтан жылытылады. Ол үшін жеке қазандық саламыз,–дейді Елдос Едіресов.
Әлібек ЫБЫРАЙ
Суретті түсірген Бейбіт Мейрамұлы