Өңірімізде жастар форумы жылдың нәтижелерін қорытындылап, жаңа жылға жоспар құру үшін дәстүрлі түрде өткізіліп келеді. Бұл жолы “Жастар қуаты – табысты келешекке 7 қадам” деген атаумен жаңадан ашылған оқушылар сарайында ұйымдастырылды, алға қойған мақсаттарға тың идеялармен бірге қол жеткізуге бағытталды.
“Шығармашылыққа ұмтылып, жаңалық ашуға талпынған облысымыздың түкпір түкпірінен келген жастар соңғы үлгідегі техникалармен жабдықталған жаңа ғимаратта өздеріне жасалған жағдайды көре отырып, тың идеяларын ұсына алады”, – деді форумды жаңа ғимаратта өткізудің өзіндік себебін түсіндірген облыстық қоғамдық даму басқарма басшысының орынбасары Абылайхан Мүбаракұлы.
Форум подкасттың LIVE-жазба форматындағы пленарлық отырысынан басталды. Онда Солтүстік Қазақстан облысы “Зейнеп” колледжінің информатика пәнінің оқытушысы, танымал ауыл блогері Асылым Ахметова мен желіде халықтың салт дәстүрін, мәдениетін насихаттап жүрген жеке кәсіпкер Вера Мәдиева қонақта болды.
Бұдан кейін кейін қатысушылар бірнеше бағыттар бойынша оқыту секцияларына бөлінді.
Рудный қаласынан келген Алмат Есболұлы жастардың биік белестерді бағындыратына сеніммен қарайтынын айтты.
“Бүгінде Рудный қаласының тау-кен технологиялық колледжінде қызмет етемін. IKOSTANAY оқушылар сарайында өтіп жатқан жастар форумынан көп нәтиже күтемін. Көптеген тәжірибе, білім аламын деп ойлаймын. Жастарға айтарым, ешқашан қорықпай тек алдыға қадам басу керек. Болашақта тек алға ұмтыла берейік”, – дейді ол.
Іс-шарада кәсіпорындардағы жас мамандарды қолдау, мансаптық өсу мүмкіндіктері, жастар арасында тәрбие жұмысын жетілдіру, өңірдегі жұмыстың жаңа тәсілдері мен форматтары жайлы сөз болды. Сондай-ақ психологиялық көмек көрсету және волонтерлікті дамыту сияқты негізгі мәселелер талқыланды.
Арқалық қаласындағы жастар орталығының директоры Данияр Қуанышұлы жастарды ел үшін тыңбай еңбек етуге шақырды.
“Болашақ жастардың қолыңда, сол себептен бұл жастар форумы үлкен мүмкіндіктер алаңы болатынына сенеміз. Арқалық қаласынан алты қатысушы келдік. Көптеген тың ақпараттармен танысып, көрген- білгенімізді өзіміздің жасөспірімдерге үйретуге тырысамыз”, –дейді ол.
Форумда жастар мен кәсіби мамандар арасында тәжірибе алмасу платформасы құрылды. Бітіруші курстың студенттері мен облыс кәсіпорындары, аудан белсенділерін қолдау үшін болған диалог алаңында жастар мен жасөспірімдер арасындағы тәрбие, өңіріміздегі жұмыс істеудің жаңа тәсілдері мен форматтары талқыланды.
Динара Қожамұрат осы форумға Арқалық қаласынан келген. Негізі Жетісай қаласының тумасы. Қазіргі таңда Ы. Алтынсарин атындағы Арқалық педагогикалық институтының 2-курс студенті. Тарих білім беру бағдарламасы бойынша білім алып жатыр.
“Жастар форумына биыл алғаш рет қатысып отырмын. Үлкен ортаға келіп, жаңа достар таптым. Біз жастар, алдағы уақытта белсенді дамып, елімізге жаңашылық алып келеміз деген ойдамын”, – дейді Динара.
Сарапшылар клубы жастар ресурстық орталығы мамандары мен психологтары үшін тегін психологиялық көмек көрсету мен еріктілер клубтарын ұйымдастыру туралы ұсыныстарын атап өтті.
Наурызым ауданы жастар ресурстық орталығының директоры Айнұр Дәулетханқызы осы форумның ұйымдастырушыларына өз алғысын білдірді.
“Жастарымыз жұмыста табысты болсын деп тілеймін”,– деп өз ізгі тілегін жолдады.
Форумда жастар саясаты саласындағы ерекше жетістіктері мен өңірдегі жастар бастамаларын табысты насихаттағаны үшін Жітіқара ауданы ішкі саясат бөлімінің жастар ресурстық орталығы 2023 жылдың үздік жастар ресурстық орталығы номинациясын иеленді.
“Біздің орталықтың жағдайы жылдан-жылға жақсарып келеді. Атқарып жатқан қызметтеріміз жақсы нәтиже беруде. Сондықтан, Жітіқара ауданының әкімдігіне алғысымыз шексіз. Себебі бізді жеке ғимарат, арнайы көлікпен қамтамасыз етіп отыр. Іс-шараларға арнайы қаражат та бөліп жатыр. Бұл мемлекеттің бізге деген қолдауы. Біздің мақсатымыз – ауданымызда жастар саясатын дамыту. Алдағы уақытта белестерді асып, шыңдарды бағындырамыз деген ойдамыз. Ең бастысы белсенді жастарымыз көп болсын”, – дейді Жітіқара аудандық жастар ресурстық орталығының басшысы Ділдә Қайрат.
Диана Батырбек
Суреттерді түсіргендер: Бағдат Ахметбеков, Б. МЕЙРАМҰЛЫ