Арқалықта волейбол ойынынан ашық турнир өтті. Бұл жарыста торғайлық команданың бәсі басым болды.
Екінші орынды Амангелді ауданы, үшінші орынды Арқалық қаласының командалары иеленді. Осылайша, екі күн қатарынан қаланы дүбірге бөлеп, жаңадан ашылған «Қазақстан» спорт кешенінде өткен өрнекті ойындар жанкүйерлердің көзайымына айналды.
Волейболдан 40 жастан жоғары ерлер командалары арасында қалалық ашық турнирге алаң иелерімен қатар көршілес аудандардың командалары да қатысып, жүлдегер атанды.Салтанатты ашылуында еліміздің әнұраны шырқалып, спортшыларды қаланың сыйлы ардагерлерінің бірі Қаратай Нұрманов, қалалық дене тәрбиесі және спорт бөлімінің басшысы Айтжан Мәліков, қалалық білім бөлімінің аға спорт тәлімгері Ораз Даркеновтер жылы лебіздерін білдіріп, бұқаралық спортты дамытуда жасалып жатқан оң өзгерістерге ризашылықтарын білдірді.Турнир түйінінде жарыс жеңімпаздары мен жүлдегерлеріне кубок, медаль, мадақтама және ақшалай сыйақы табысталды. Сонымен қатар, үздік ойын көрсеткен ойыншыларға яғни, үздік ойыншы, шабуылшы, доп үйлестіруші, ардагер ойыншыларға статуэтка табыс етілді.
Мұрат ЖҮНІСҰЛЫ
Суреттерді түсірген – автор
Арқалық қаласы