Арқалық жұртшылығы қаланың орталық «Наурыз» алаңында «Төрлет, құтты Жаңа жыл – 2024» атты мерекелік бағдарламаны тамашалады.Дала сахнасында театрландырылған көріністер қойылып, жыл кейіпкерлері көңілді думан жасады.
Қаланың бас шыршасының жанына жиналған жұртшылықты қала әкімі Әмірхан Асанов құттықтап, өңір халқы үшін аса маңызды бірқатар тың ақпараттармен бөлісті.
«Мемлекет басшысы Қасым-Жомарт Кемелұлы Тоқаевтың Қазақстан халқына Жолдауында айтылған ауқымды саяси өзгерістер мен әлеуметтік-экономикалық бағыттағы оң шешімдер халыққа жігер беріп, болашаққа деген сенімін арттырды. 2023 жыл біздің қаламыз үшін де нәтижелі жыл болды. Құрылыс саласында бірқатар ауқымды жұмыстар атқарылды. Алдағы жылда да қаламыз қайта түлеп, ауқымды жобалар қолға алынбақ. Ел үкіметі Арқалық қаласын, Аманкелді, Жанкелдин аудандарын дамытудың 2023-2027 жылдарға арналған кешенді жобасын қабылдап, 500 миллиардтан астам қаражатқа өндірісті дамыту, ауылшаруашылық, кәсіпкерлік салаларын жандандыру, жаңа жұмыс орындарын ашу, инфрақұрылымды жақсарту сынды 137 іс-шараны бекітті. Қазірдің өзінде Арқалық қаласы бойынша 350 миллиард теңгеге жуық қаражатқа 2 мыңға жуық жұмыс орнын құра отырып, 3 ірі инвестициялық жоба іске асырылуда», – деді қала әкімі Әмірхан Асанов.
Мұнан соң қала басшысы жыл сайын дәстүрге айналған «Жомарт жүрек» лауреаттарын марапаттады. Арқалық қаласы бойынша бұл сыйлыққа белсенді азаматтық ұстанымы және қайырымдылық қызметті жүзеге асырғаны үшін «Туған өлке» номинациясымен түрлі ғимараттарды қалпына келтіріп, қаланың көріктенуіне үлес қосқан жеке кәсіпкер Абат Ерденов, жер игеріп, егін шаруашылығымен шұғылданушы, ұлттық домбыра күніне арналған іс-шаралардың демеуші болған «Алтай» шаруа қожалығының жетекшісі Игілік Алтаев, «Жыл меценаты» номинациясымен жыл сайын қаланың әлеуметтік аз қамтылған отбасыларына қолдау білдіріп жүрген жеке кәсіпкер Қуаныш Байменов марапатталды.
Жаңа жыл кешінде қала өнерпаздары ән-жырдан шашу шашты. Мерекелік іс-шара тұрғындардың сан алуан түспен аспан көгін өрнектеген отшашу тамашалауымен жалғасты.
Мұрат ЖҮНІСҰЛЫ
Суреттерді түсірген автор
Арқалық қаласы
А