Арқалықта биыл Қарабалық ауданында өткен ХХХVІІ-ші облыстық спартакиада және Денисов ауданында мүмкіндігі шектеулі жандар арасында өткен спорт фестивалдерінің қорытындысы бойынша марапаттау іс-шарасы көрініс тапты.
Облыстық спартакиадада Арқалық қаласының спортшылары спорттың 18 түрінен қоржынға 43 медаль салып, жалпы командалық есепте 5-ші орынға тұрақтады. Ал, мүмкіндігі шектеулі жандар арасындағы облыстық спорт фестиваліне 7 адам қатысып, 11 медаль иеленген болатын.
Салтанатты шақта спортшыларды қала әкімі Әмірхан Асанов құттықтап, сый-құрметін көрсетті.
«Мемлекет басшысы бұқаралық спортты дамыту мақсатында 2030 жылға дейін халықтың 50%-ін дене шынықтыру және спортпен қамту міндетін қойған болатын. Қазіргі таңда Арқалық қаласында 17 мыңға жуық адам спортпен айналысады. Бұл қала халқының 45%-ін құрайды», – деп атап өтті қала әкімі Әмірхан Біркенұлы.
Қалада дене шынықтыру және спортты дамыту жұмыстарын 184 дене шынықтыру қызметкерлері жүргізеді. Жыл ішінде қала мен ауылдарда 463 спорттық-бұқаралық іс-шаралар өткізіліп, оларға 21 мың адам қатысқан.
2024 жылы өңірде Қазақстан Республикасының 2 спорт шебері, 45 спорт шеберлігіне үміткер шығып, 178 спорттық разрядтар орындалды. Қазақстан Республикасының Чемпионаттары мен кубоктарында 11 спортшы жеңімпаз, 26 спортшы жүлдегер атанды. Халықаралық жарыстардың жеңімпаздары мен жүлдегерлері де аз емес.
ҚР еңбек сіңірген жаттықтырушысы Абай Сарыбаев пен спорт ардагері Алпыс Іңірбаевқа қала әкімінің Құттықтау хаты табыс етіліп, иықтарына шапан жабылды.
Қазақ күресі мен дзюдодан І орын, тоғызқұмалақтан әйелдер құрамасы ІІ орын, ерлер құрамасы ІІІ орын, гір спортынан ІІІ орын, көкпардан ІІІ орын, аударыспақтан ІV орын және жеңіл атлетикадан үздік нәтиже көрсеткен команда мүшелері, сондай – ақ мүмкіндігі шектеулі жандар арасында үстел теннисі, асық ату, дартс сынды спорт түрлерінен үздік нәтиже көрсеткен спортшылар қала әкімінің Алғыс хаты және ақшалай сыйлықтармен марапатталды.
«Еңбектің еленгені адамды үлкен жетістіктерге жетелейді. Жыл сайын дәріптеп, спортшыларымызға күш-жігер сыйлап отырған қала басшылығына зор алғысымызды білдіреміз. Ел-жұртымыз бақытқа кенеліп, шәкірттеріміздің алар асулары мол болсын», – дейді Тоғызқұмалақтан жоғары дәрежедегі жаттықтырушы Алпыс Қабиұлы.
Спортшыларды ұлықтау сәтінде ұзын саны алпыстан астам спортшы мен жаттықтырушыларға құрмет көрсетіліп, қала өнерпаздары ән мен жырын ұсынды.
Мұрат Жүнісұлы
Суреттерді түсірген – автор
Арқалық қаласы