Торғайда көп жылдан бері кәсіпті табыс көзіне айналдырған жандар жетерлік. Солардың бірі – Асхат Сафарғалиев. Ол Торғайдан табан аудармай-ақ, ұзақ жылдан бері желілік кәсіпкерлікті жолға қойған іскер азамат. Жақында ол аудан орталығынан жаңа дәріхана ашты.
–Аида есімді қызым Астанадағы медицина университетінің фармацевт факультетін бітіріп келді. Әрине, жоғары білімді жастарға қазір кез келген жерде жұмыс табылады. Бірақ, біз баламыздың болашағын Торғаймен байланыстыруды жөн көрдік. Мұнда да бір қауым ел бар. Өзіңе ұнаған кәсіпті игеруге мүмкіндік мол. Сондықтан, қызым дипломын алып келгесін, жұмыссыз отырмасын деп дәріхана ашып бердік. Бір жағы халыққа сапалы қызмет көрсетеді, кәсіпкерлікті де игере бермек. Меніңше, бұл жастар үшін тиімді,– дейді кәсіпкер Асхат Сафарғалиев.
Енді, еміне шипа, дертіне дауа іздеген жандар дәрі-дәрмекке алаңдамайтын болды. Жас кәсіпкер Аида Надимнің дәріханасында барлық дәрі түрі бар. Мұнда бас сұққан тұрғындар өздерінің қан қысымын өлшей алады.
–Дәл орталықтан жаңа дәріхананың ашылғанына қуанып отырмыз. Енді керек дәрілерімізді осы жерден алып тұрамыз. Қызметі сапалы. Иесі жақында оқу бітіріп келген жас бала. Еңбегіне табыс тілеймін,–дейді Торғай кентінің тұрғыны Әмірбек Салық.
Әлібек ЫБЫРАЙ
Суреттерді түсірген Бейбіт Мейрамұлы
Жанкелдин ауданы